Sámediggeráđđi lea juolludan 17 762 000 ru oahpponeavvuid ráhkadeapmái. Sámediggeráđđi Silje Karine Muotka muitala ahte leat boahtán olu buorit ohcamat. Mis lea mihttun ahte buot fágain galget leat oahpponeavvut, ja ohppiide geain lea earenoamážit heivehuvvon oahpahus ja mánáidgárddiide galget leat oahppanresurssat.
Sámedikkis lea ovddasvástádus sámi oahpponeavvoráhkadeapmái vuođđooahpahussii. Sámediggái leat boahtán ohcamat oktiibuot 67 miljovnna ruvnno ovddas. Bušeahtas lei várrejuvvon 17,6 miljovnna ruvnno dan ulbmilii.
Sámediggeráđđi Silje Karine Muotka muitala ahte sámediggeráđđi vuoruha sámegiela nubbingiellan dán jagi juolludeamis.
-Sámediggi háliidii dustet dan hástalusa go ohppiidlohku geat válljejedje sámegiela nubbingiellan unnui. Mii leat álggahan olu doaimmaid jorgalandihte dan ovdáneami, vai eanet oahppit fas válljejit sámegiela nubbingiellan, ja dán jagi vuoruha sámediggeráđđi oahpponeavvuid dán fágii davvi-, julev- ja lullisámegillii.
Juohke oahpponeavvoprošeakta lea hui divrras, muitala Muotka.–Dat lea áibbas čielggas ahte lea dárbu garrasit nannet oahpponeavvoráhkadeami ja dat lea ge vuoruhuvvon suorgi politihkalaš barggus. Earret eará lea sámediggeráđđi máŋgga oktavuođas ovddidan jearaldaga ollásiidgokči oahpponeavvu Salaby ruhtadeami birra. Dan barggu mii áigut ain čuovvolit, dadjá sámediggeráđi lahttu Muotka.
Čuovvovaš prošeavttat leat ruhtaduvvon:
Davvisámegiella nubbingiellan, sámegiella 2/3 mánáidceahkis 1b-3b dássái juolluduvvo Davvi Girjái 5 722 000 ru ráhkadit ja buvttadit ollásiidgokči oahpponeavvobuktosa mas leat 7 vuođđogirjji, bargobihtát ja neahttaresursa ohppiide ja oahpaheaddjibagadus neahta bokte.
Davvisámegiella nubbingiellan, sámegiella 3 nuoraidceahkis/sámegiella 4 Jo3:s goalmmát dássái juolluduvvo Davvi Girjái gitta 1 355 000 ru ráhkadit ja buvttadit oahppigirjji, bargogirjji ja neahttaresurssa.
Julevsámegiella nubbingiellan, sámegiella 2/3 mánáidceahkis 1b-3b dássái juolluduvvo Solum lágádussii gitta 5 166 000 ru ráhkadit ja buvttadit ollásiidgokči oahpponeavvobuktosa mas leat 7 vuođđogirjji, bargobihtát ja neahttaresursa ohppiide ja oahpaheaddjibagadus neahta bokte.
Lullisámegiella nubbingiellan, sámegiella 2/3, 4.-6. dássái juolluduvvon Solum lágádussii 3 762 000 ru ráhkadit ja buvttadit ollásiidgokči oahpponeavvobuktosa mas lea vuođđogirji juohke dássái, bargobihtát ja neahttaresursa ohppiide ja oahpaheaddjibagadus neahta bokte.
Statped Nordii juolluduvvui gitta 115 000 ru ráhkadit ja buvttadit earenoamášpedagogalaš oahpponeavvu Giellaálgu, mii lea ohppiide geat dárbbašit molssaevttolaš ja liige gulahallama (ASK).
Sámi lohkanguovddážii juolluduvvui gitta 884 000 ru jorgalit ja heivehit Tiltak til TRAS davvi-, julev- ja lullisámegillii. Dat lea ideagirji mii lea oassin TRAS áicanreaiddus mii fállá máhtolašvuođa 2-5 jahkásaš mánáid giellaovdáneami birra.
Davvi Girjái juolluduvvui gitta 758 000 ru ráhkadit ja buvttadit álkes lohkangihppagiid 8.-9. dássái davvisámegillii, mii ollašuhttá mánáidceahki álkes lohkangirjeráiddu.
Eeanet dieđut:
Sámediggeráđđi Silje Karine Muotka, + 47 984 87 576