Mandat for Fjordfiskenemda.docx 18,80 kB
Sámediggi ja Guolástusdepartemeanta leat soahpan Vuotnaguolástuslávdegotti mandáhta. Dát lea Riddoguolástuslávdegotti čuovvoleapmi ja galgá nannet vuotnaguolásteami hálddašeami erenoamáš deattuhemiin sámi guolástusa ja dan mearkkašumi sámi báikegottiide.
- Lean ilus go mii dál fargga oažžut Vuotnaguolástuslávdegotti doibmii. Das galgá leat deaŧalaš mearkkašupmi dasa ahte ovddidit báikkálaččat heivehuvvon doaibmabijuid nugo vuostáiváldinbáikkiid nannen dihtii riddoservodagaid, dadjá ráđđelahttu Silje Muotka.
Vuotnaguolástuslávdegoddi galgá bargat dakkár áššiiguin nugo muddendoaibmabijuiguin, vuotnalinnjáid mearridemiin gieldit badjel 15 mehter fatnasiid bivdimis ja mearridit dorskelasseeriid sturrodaga ja juogadeami rabas joavkkus. Vuotnaguolástuslávdegoddái nammaduvvojit golbma olbmo Sámedikkis ja okta olmmoš guđe ge fylkkas Finnmárkku, Romssa ja Nordlándda fylkkas.
- Lea deaŧalaš oažžu buori čoahkkádusa Vuotnaguolástuslávdegoddái mas leat sihke aktiiva vuotna- ja riddoguolásteaddjit ja eará dárbbašlaš gelbbolašvuohta ja vásáhusat. Mii áigut Sámedikki bealis fargga váldit oktavuođa fylkkagielddaiguin ráđđádallat ollislaš čoahkkádusa. Sámediggi áigu guldalit árvalusaide čoahkkádusa oktavuođas, loahpaha Muotka.
Mandat for Fjordfiskenemda.docx 18,80 kB
