Sámediggi lea ožžon oahpahus- ja kulturministeriijas stáhtaveahki sámegielat árrabajásgeassima materiálabáŋkku ráhkadeapmái. Árrabajásgeassima materiálabargui ohcat golbma plánejeaddji.

Fidnu geavatlaš ollašuhttima várás sámediggi ohcá

- ovtta nuortalašgielat plánejeaddji (100 % bargoáiggiin)

- ovtta anárašgielat plánejeaddji (100 % bargoáiggiin)

- ovtta davvisámegielat plánejeaddji (70 % bargoáiggiin).

Plánejeaddji bargguide gullet ee. árrabajásgeassinmateriála plánen, gárvvisteapmi, jorgalusaid válbmen, giela dárkkisteapmi sihke materiála čohkken materiálabáŋkui. 

Bargu álgá soahpamuša mielde ja bistá 31.12.2015 rádjai. Gelbbolašvuođagáibádussan lea barggu eaktudan heivvolaš skuvlejupmi ja sámegiela máhttu (ásahus 1727/95). Barggu menestuvvi dikšuma ovddida árrabajásgeassinsuorggi dovdamuš sihke hárjánupmi materiálabarggus. Bálká mearrašuvvá Sámedikki bálkávuogádaga gáibádusdási IV/IV mielde (vuođđobálká 2457,04 euro/mb). Vuođđobálkká lassin barggus máksojuvvojit 24 % sámeguovllu lassi ja ahkelasit. Plánejeaddji doaibmabáiki lea sámekulturguovddáš Sajosis.

Ohcamušat oktan mildosiiguin galget doaimmahuvvot sámedikki čállingoddái 27.2.2015 dmu 16.00 rádjai čujuhussii Sajos, 99870 Anár/Inari. Lassedieđuid barggu birra addá Sámedikki má. hálddahushoavda Pia Ruotsala 010 839 3106. Sámedikki doibmii sáhttá oahpásmuvvat neahttačujuhusas www.samediggi.fi