Stivra dohkkehii evttohusa riikkabeaiválggaide oassálasti bellodagaide riikkabeaiválggaid temán sámiid dáfus. Sámediggi bargá maŋŋá dárkilut evttohusaid ráđđehusprográmma sámiid guoski ulbmilin ja buktá duogášdieđuid ráđđehusráđđádalliide. ”Stivra barggai evttohusa vehá ođđa vuogi mielde. Háliideimmet buktit bellodagaide dieđuid sámiin positiivvalaš vuoiŋŋas. Sámit leat Supmii riggodat, ii problema. Mis leat sámemánát ja nuorat geat háliidit oahppat iežaset giela ja ealáhusaid ja stáhta galgá addit sidjiide dasa vejolašvuođa.” sámedikki ságajođiheaddji Klemetti Näkkäläjärvi muitalii. 

Sámedikki bargan evttohusas deattuhuvvojit sámiid vuoigatvuođat, sámedikki barggut, sámegielaid ja ealáhusaid guoskevaš vuoigatvuođat sihke oahpahusa, sosiála- ja dearvvasvuohtabálvalusaid ja sámenuoraid dáfus guovddáš áššit.  Sámediggi sávai, ahte riikkabeaiválggain livčče vuođđo- ja olmmošvuoigatvuođaid ektui miehtemielalaš vuoigŋa. ”Nappo earáge dehálaš áššit leat, muhto háliideimmet vuodjut moatte áigeguovdilis temái. Sávan, ahte bellodagat ja riikkabeaiválgaevttohasat oahpásmuvvet evttohusaide ja dorjot daid. Sámediggi lea maiddái álo gearggus addit lasi dieđuid”, ságajođiheaddji Näkkäläjärvi deattuha.

Sámedikki stivra dohkkehii cealkámuša Yle čilgehusas jagis 2014. Sámediggi deattuhii, ahte Yle Sápmi sámegielat ođasbuvttadeapmi lea buorránan iežas doaimma ovddidemiin. Sámegielat nuoraidprográmma Sohkaršohkka lea áidna sámegielat nuoraidprográmma ja erenomáš dehálaš. Sámediggi gáibidii Yle Sápmái iešráđálut sajádaga.  Sámediggi árvvoštallá, ahte čilgehusjagi leat dáhpáhuvvan sámiid dáfus erenomáš dehálaš sisriikkalaš ja riikkaidgaskasaš áššit ja ođđasat, main Yle Sápmi lea lihkosmuvvan muitalit ođđasiin viidát, jođánit ja luohtehahttiláhkai. Bohtosiid buktán doaibma galggašii oidnot Yle Sápmi ruhtadeamis dálá buorebut ja galggašii vuhtiiváldot dat, ahte Yle Sápmi ii bálval dušše sámiid, muhto olles suopmelaš servodaga. Olles suopmelaš servodat, mearrideaddjit ja virgeoapmahaččat dárbbašit dieđuid sápmelaččain ja eamiálbmogiid vuoigatvuođain. Yle Sápmi ruhtadeami galgá guorahallat dánge dáfus viidásabbot olles Yle:a servodatlaš geatnegasvuođaid ektui.

Sámediggi giddii fuopmášumi sámegielat mánáidprográmma vátnivuhtii ja nuoraid sámegielat tv-prográmma váilumii. Yle Sápmi ođasbuvttadeami galggašii ollašuhttit viidásabbot heailla sámiid ruovttuguovllus, anáraš- ja nuortalašgielat prográmmabuvttadeami lasihit ja prográmmaáiggi nu televisios go radiosge galgá lasihit. Sámediggi lea fuolas Yle doaibmalanjaid dilis ja Yle Sápmi báddearkiivvas, mii ii leat velge digitaliserejuvvon. Sámediggi gáibida Yle darvánit dáid váilevuođaide. 

Sámedikki stivra evttohii dievasčoahkkimii ahte dat dohkkeha sámedikki muitalusa jagis 2014 sihke čilgehusaid oahppamateriálamearreruđa geavaheamis ja sosiála- ja dearvvasvuohta-bálvalusmearreruđa geavaheamis jagi 2014. Stivra nammadii ovddasteaddjin Buohccedivššárin kampusviidodaga olggobealde - fidnu stivrenjovkui Pia Ruotsala.  Fidnu lea Lappi ámmátallaskuvlla, Gihttela, Anára, Soađegili ja Giemajávrri gielddaid sihke Lappi buohccedikšunbiirre vuođđodearvvasvuođafuolahusa ovttadaga fidnu. Dan dárkkuhussan lea ráhkadit doaibmamálle, mii dahká vejolažžan váldit oahpu buohccedivššárin kampusviidodaga olggobealde.

Stivra gieđahalai eará áššiin Deanu soahpamuša dili ja mearridii ásahit ráđđádallanbargojoavkku, masa gullet Klemetti Näkkäläjärvi, Nilla Tapiola, Ilmari Tapiola ja Asko Länsman. Sin bargun lea ráđđádallat Norgga sámedikkiin Deanu guolástansoahpamušas. Ráđđádallamiid maŋŋá sámedikki stivrra vuođđudan sierra Deatnu-bargojoavku, masa gullet Sámedikki buot Ohcejoga lahtut, jotket ášši gieđahallama. 

Stivra gieđahalai Sajosa geavahan- ja láigoeavttuid ja mearridii ráđđádallat dálu eaiggádiin, Senaatti-giddodagain, áššis. 

Stivra nammadii nuoraidráđi evttohusa mielde SPR:a nuoraidpolitihkalaš prográmma válmmaštalli bargojovkui fásta lahttun Elli-Marja Hetta ja várrelahttun Nilla Rahko. Prográmma válmmaštallamis vástida Suoma sámediggi. Prográmma lea mearri válmmaštuvvat dán jagi. 

Stivrra čuovvovaš čoahkkin dollojuvvo dievasčoahkkima maŋŋá 24.2.2015.  

 

Saamelaiskäräjien esitykset puolueille eduskuntavaaleja 2015 varten