Dáiddadáhpáhus lei sámenuoraid ja oahpaheaddjiid dáidduid čájáhus |
![]() |
![]() |
Sámenuoraid dáiddadáhpáhus, mii ordnejuvvui Ohcejogas njukčamánu 25.-26. beivviin lei fas sámenuoraid ja oahpaheaddjiid dáidduid ivdnás čájáhus. Dáhpáhusa váldotemán lei musihkka, mii čuojai Ohcejotnjálmmi skuvlla sáles luđiin, leuddiin, lávlagiin ja räppiin, maid mieđuštedje máŋggat nuoraid iežaset čuojahanjoavkkut. Sámediggi giitá buohkaid, geat iešguđet vugiiguin oassálaste dáhpáhusa ordnemii, bures lihkkostuvvan dáhpáhusas!
Sámenuoraid ovddasteaddjin riikka dási SOUNDS-dáhpáhussii Porvoo-gávpogii válljejuvvuiga ohcejohkalaš Villat-joavku ja avvillaš Čagaldahttit-joavku. Villat-joavku vuolgá riikka dási dáhpáhussii bihtáinis Dan man oainnát, man bagadallin bargá Niilo Rasmus. Avvila vuolleskuvlla joavku Čagaldahttit vuolgá Porvoo-gávpogii bihtáinis Čagaldahttin, man leat bagadallan Maarit Niittyvuopio, Laura Niittyvuopio ja Hannu Huumonen.
Ohcejotnjálmmi skuvlla sále dievai maŋimuš stuolu mielde duorastaga 26.3. Báikki alde ledje sámenuorat, oahpaheaddjit, fuolaheaddjit ja geahččit badjel 400. Oassálastit bohte oktiibuot badjel 15 skuvllas sámeguovllus ja dan olggobealde. Sámeguovllus ledje oassálastit measta juohke skuvllas. Sámeguovllu olggobealde oassálaste nuorat Helssegis ja Roavvenjárggas.
Sullii bealli dáiddadáhpáhussii oassálastan nuorain ledje mielde juo dáiddadáhpahusbargobájiin ja rahpandilálašvuođas, mat ordnejuvvojedje gaskavahku 25.3. Bargobájiid váldotemán lei teáhter, mainna hálidedje juo ráhkkanit jagi 2016 dáhpahussii. Suoivanteáhtera bargobáji bagadalai giellabeassebagadalli ja musihkkár Heli Aikio, eará teáhterbargobájiid filbmabagadalli Pauliina Feodoroff, musihkkár-neavttár Sverre Porsanger, neavttár-doaimmaheaddji Heli Huovinen ja mánáid TV-prográmma Unna Junnás dovddus neavttár Irene Länsman. Oassi nuorain oahpásnuvai ráidogovvabargui govvadáiddar Sunna Kitti oahpus. Oassi nuorain oaččui oahppodiimmu sámegielat rápmusihka suollemasvuođaide musihkkár Ailu Valle oahpus.
Sámenuoraid dáiddadáhpáhus eallá juo viđat jahkelogis ja dat lea šaddan áiggi mielde dehálaš arenan máŋgga nuoraide, geain leat dáiddalaš beroštumit. Dáiddadáhpáhus, mii ordnejuvvo jahkásaččat, addá dehálaš loaiddastanvásihusaid ja mii buot deháleamos, iežasgielat guldaleaddjiid ja geahččiid. Sámenuoraid dáiddadáhpáhusa giellan Ohcejogas ledje buot golbma Suoma sámegiela. Dáhpáhusa láidesteaddjin barge nuortalašgielat Anna-Katariina Feodoroff, anárašgielat Martta Alajärvi ja davvisámegielat Tuomo Laiti.
Dáhpáhusa duopmárin barge nuortalašgielat Anna Lumisalmi, anárašgielat Heli Aikio ja davvisámegielat Ailu Valle. Okta dáiddadáhpáhusa prinsihpain lea, ahte dat doaibmá sámegielain.
Sámenuoraid dáiddadáhpáhusa ordnii sámediggi ovttasbarggus Ohcejotnjálmmi skuvllain. Dáhpáhusa ruhtada oahpahus- ja kulturministeriija. Sámenuoraid dáiddadáhpáhus lea oassi riikaviidosaš Nuorra kultuvra-dáhpáhusas. Dáhpáhusa teknihkas fuolahii Tuupa Records Jussi Isokoski jođihemiin.
Dáiddadáhpáhusa stipeanddain bálkášuvvojedje čuovvovaš joavkkut:Gáktenieiddat: Mánu luohti Gáregasnjárgga skuvla, 6-9-jahkásaččat, bagadallin Kaaren Kitti
Hearvaduottar: Máttuid árbi Heahtá skuvla, 10-15-jahkásaččat, bagadallin Inga-Máret Gaup-Juuso ja Anne-Maria Kukkonen
Janita & band: Iežas geaidnu Avvila badjeskuvla, 10-15-jahkásaččat, bagadallin Katri Kittilä
SKT: Jåågar lij jie´lli, One of Us, Duna Duna Čeavetjávrri skuvla, 10-15-jahkásaččat, bagadallin Erkka Antila ja Seija Sivertsen
Giehtaruohttasa mánát: Buot jagiáiggit Gárasavvona skuvla, 10-15-jahkásaččat, bagadallin Ulla Magga ja Taina Syväjärvi
Puállâm váimu: Ääših maid monâttáim tuulân Avvila logahat, 16-20-jahkásaččat, bagadallin Petra Kuuva
Villat: Dan man oainnát Ohcejotnjálmmi skuvla, 16-20-jahkásaččat, bagadallin Niilo Rasmus
Čagaldahttit: Čagaldahttin Avvila vuolleskuvla, 10-15-jahkásaččat, bagadallin Maarit Niittyvuopio, Laura Niittyvuopio ja Hannu Huumonen
Geahča dás DÁIDDADÁHPÁHUSGOVAID, govat Terhi Tuovinen.
Jagi 2016 Sámenuoraid dáiddadáhpáhus ordnejuvvo Anáris Sajosis ja temán lea teáhter.
|
|
Viimeksi päivitetty ( 02.04.2015 ) |