Sámedikki stivra merkii diehtun Sámedikki bargoburesveadjinjearahallama bohtosa ja attii bargoburesveadjima guoski ovddidandoaibmabijuid válmmaštallama čuovvunjoavkku bargun, mii goziha bargoveahkapolitihkalaš áššebáhpáriid ollašuvvama.

Stivra dohkkehii cealkámuša preassadoarjaga juohkimis jagi 2015 johtolat- ja gulahallanministeriijai doaimmaheami várás. Stivra gieđahalai maiddái cealkámuša Suoma mearreáigeraportahápmosa nállevealaheami jávkadeami guoski riikkaidgaskasaš oktasašsoahpamuša ollašuhttimis. Loahpalaš cealkámuš addojuvvo 24.4.2015. Oktasašsoahpamuša ulbmilin lea eastadit náli, liikeivnni, sohkaduogáža dahje álbmotlaš dahje etnihkalaš duogáža vuođul dáhpáhuvvan vealaheami. Suoma 23. raporta addojuvvo komiteai borgemánus 2015.

Stivra ságastalai boahttevaš ráđđehusprográmma várás dahkkon evttohusain lávdegottiid válmmaštallan áššebáhpára vuođul.

Stivra dohkkehii cealkámuša guoskkadin bohccuid ja luondduealáhusaid ruhtadeami guoski
muhtin ásahusaid eana- ja meahccedoalloministeriijai doaimmaheami várás. Cealkámuš guoskkai golbma sierra ásahushápmosa; stáhtaráđi ásahus boazodoalu ja luondduealáhusaid ruhtadandoarjagis addojuvvon stáhtaráđi ásahusa nuppástuhttimis, stáhtaráđi ásahus boazodoalu ja luondduealáhusaid muhtin ráhkadusdoarjagiid ohcanáiggi álgimis sihke eana- ja meahccedoalloministeriija ásahus boazodoalu ja luondduealáhusaid ruhtadandoarjaga čuoziheamis addojuvvon eana- ja meahccedoalloministeriija ásahusa nuppástuhttimis. Sámediggi doallá ásahusaid johtilis fápmuiboahtima erenomáš dehálažžan.

Stivra nammadii Klemetti Näkkäläjärvi sadjái ođđa ovddasteaddjiid čuovvovaš bargojoavkkuide:
- ávnnahis kulturárbbi áššedovdijovkui Petra Magga-Vars,
- Barentsa Euroárktalaš ráđi (BEAC) eamiálbmogiid bargojovkui Tiina Sanila-Aikio ja várrelahttun Anna Morottaja.
- olmmošvuoigatvuohtasáttagoddái Anne Nuorgam ja várrelahttun Heikki Paltto.
- Davviriikkalaš sámesoahpamuša ráđđádallangoddái Juha Karhu.
- Meahciráđđehusa Lappi ráđđádallangoddái Yrjö Musta ja várrelahttun Jouko Hetta.
- Suoma iehčanasvuođa 100- jagi ávvujagi prošeavtta sáttagoddái Tiina Sanila-Aikio ja várrelahttun Ulla-Maarit Magga.

Stivra evttohii dievasčoahkkimii, ahte dat mieđiha earu Veikko Porsangerii su bivdagis sosiála- ja dearvvasvuohtalávdegotti, kulturlávdegotti sihke ealáhus- ja vuoigatvuohtalávdegotti lahttovuođas ja ahte dievasčoahkkin vállje Porsanger sadjái sosiála- ja dearvvasvuohtalávdegoddái ođđa ságajođiheaddji, kulturlávdegoddái ođđa várreságajođiheaddji sihke ealáhus- ja vuoigatvuohtalávdegoddái ođđa várrelahtu.

Stivra dohkkehii Kelai doaimmaheami várás evttohusa, mii guoská sámegielat veajuiduhttinkurssaid ordnema jagi 2016. Sámediggi bivdá Kela čielggadit sáhttágo sámegielat veajuiduhttinkurssaid ordnet almmá skáhpponlága eaktudan gilvalahttima EU njuolggadusaid mieldásaš geatnegahttinbálvalussan ja ahte sáhttágo daid skáhppot oastobálvalussan Norggas.

Sámegielat veajuiduhttinkurssaid ollašuvvama stuorámus hástalussan leamašan dat, ahte kurssaide eai leamašan almmuheaddjit. Dát boahtá muhtin muddui das, ahte Kela lea oastán jagi 2013 rájes sámegielat veajuiduhttinbálvalusaid ee. Rokuas, gosa sámiid ruovttuguovllus lea guhkes mátki ja eaktuda máŋgga beaivve mátkkošteami.

Stivra nammadii sámi oahpahusguovddáža Čuojat Juoigga Livđuu Leu´dde! sámemusihka rávesolbmuidskuvlenfidnu stivrenjovkui Anna Morottaja ja várrelahttun Oula Guttorm.

Stivra ságastalai Yle Sápmi dilis ja mearridii bivdit Yleisradios sámediggelága 9 §:s dárkkuhuvvon ráđđádallamiid.

Lassidieđuid addá Sámedikki ságajođiheaddji Tiina Sanila-Aikio tel. 050300 1780, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.