Anára kirkosiiddas, sámekulturguovddáš Sajosis rahppojuvvojit čájáhuslanjat sápmelaš dáiddáriidda. Vuosttas čájáhusa rahpamat dollojit duorastaga 25.6.2015, goas Petteri Laiti ávvučájáhus rahppojuvvo olbmuide. Čájáhus lea ovdan Sajosis 30.9.2015 rádjai.
Sápmelaš silbarávdi ja dáiddaduojár Ásllat-Mihku Biehtár |Petteri Laiti
Duojár
Petteri Laiti lea riegádan 1950 Ohcejoga Guolnnás, Detnui luoiti
Anárjohgáttis ja gullá sámeduoji álggaheaddjiide. Laiti lea ožžon
duddjondáidduid sogas árbin. ”Áhčči lei duojár ja duddjui atnudiŋggaid,
nugo gerresiid, reagaid ja bohcco leaŋggaid badjealbmáide diŋgojumiid
mielde ja eadni lea máhttán tekstiilabargguid earret eará silkkiid,
boahkániid ja gahpiriid”, Laiti muitala.
Petteri Laiti muitala leat
bajásšaddan gilvvu vuolahasaiguin juo ruovttustis áhči duddjodettiin.
”Ovdal eai lean sierra verstát, muhto duddjojuvvui stobus ja šiljus.”
Laiti lea válmmaštuvvan silbarávdin 1984 ja gárvánettiin son vuođđudii
Anárii Átelje Samek. Dál meaštára bázedettiin ealáhahkii, su barggu
joatká Sami Laiti. Bárdni lea áhčis oahpahusas gárvánan oahppanduojárin
dahjege kisällin ja studeren suorggi maiddái Sámi oahpahusguovddážis
(SOG).
Laiti lea okta dain buoremusat dovdojuvvon Suoma beale
sámeduojáriin ja son máhttá máŋggabealagit, juoba ođđasisgeavahemiin,
árbevirolaš duddjondáidduid. Laiti lea erenomážit beaggán báhkke- ja
čoarvedujiiguin ja maiddái buvkkuiguin, muhto maiddái gárvvistan bohccos
ožžojuvvon materiálaid duodjeatnui. Su silbaduojit leat dovddusat
erenomážit das, ahte son lea ovttastahttán kreatiivvalaččat silbii
árbevirolaš duoji materiálaid ja hámiid. Laiti báhkkeduojit ja
sámesilbbat leamašan ovdan máŋggain čájáhusain Suomas ja olgoriikkain.
Petteri
Laiti: ”Lea dehalaš áddet ja diehtit dujiid sisdoalu, mearkkašumi ja
geavahandárkkuhusa. Árbevirolaš dujiid hámit ja čiŋaheamit leat
ovddiduvvon sierra materiálaid iešvuođaid ávkingeavahemiin alladássásaš
ja ealli álbmotdáidagin. Dán álbmotdáidaga galgá addit eallit ja
bálvalit servodaga.”
Ávvučájáhus Sajosis
Anára álbmotskuvllas
Petteri Laiti oaččui duođaštusa 50 jagi dassái jagi 1965. Skuvlavisti
lea Sajosa buohta, Njelješgeainnu nuppe bealde ja otná beaivve seammá
Anára boares skuvlavisttis leat Laiti bargolanjat. Čájáhusa lea nappo
lunddolaš ordnet Sajosa lanjaide, gos dat sáhttá joatkit mátkki
viidásabbot.
Čájáhus ii leat vuovdinčájáhus, muhto Laiti váldá iežas
sániidis mielde diŋgojumiid vuostá. Diŋgojuvvon dujiid duddjo jogo
Petteri ieš dahje Sami.
Sajosa geasi rabasáiggit:
Sajos info: vu-be dmu 9-17
Restauráŋŋa Lyeme: vu-be dmu 10–16
Duodji shop: vu-be dmu 10-17
Sámegirjerádju: vu-di dmu 13–19, ga-du dmu 10–17, be 10–16
Sajosa sámedujiid bargobájit ollašuhttojit áiggis 1.7. - 14.8.2015, árgan dmu 11–17.
Petteri Laiti ávvučájáhus Sajosis 26.6.–30.9.2015, Sajosa rabasáigge.
Lassidieđut:
Riitta Orti-Berg, vs. kulturčálli, Sámediggi,
Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.
, tel. 010 839 3103, www.samediggi.fi
Johanna
Alatorvinen, má. márkanastinhoavda, Sámekulturguovddáš Sajos,
Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.
, tel. 010 839 3109, www.sajos.fi
|