Sámedikki stivra gieđahalai fas Sámedikki ja Ohcejoga gieldda gaskasaš soahpamuša guoskkadin Ohcejoga gieldda sámegielat jorgalusaid. Stivra gulai áššis gielladorvočálli dillegeahčastaga. Áššis ordnejuvvon ráđđádallamiin lea boahtán ovdan, ahte vuoigatvuohtaministeriija dárkkuhussan lea beaividit ja dárkkistit sámi giellalága. Stivra mearridii báhcit vuordit vuoigatvuohtaministeriija vástádusa dasa, leago sámi giellalága dárkkisteami oktavuođas vejolaš ordnet ođđasit maiddái namuhuvvon ášši.

Stáhta bušeahtas leat vuoigatvuohtaministeriija oaiveluohká momeanttas 25.01.50 čujuhuvvon sámiid kulturiešráđđema doalaheamis boahtán goluide ruđat, main 45 000 euro ledje várrejuvvon Sámedikki čoahkkimiid ja válgalávdegotti goluid lassáneapmái sámediggelága ođastusa dihtii. Go sámediggeláhkaođastus ii ollašuvvan, 45 000 euro geavahandárkkuhus dasto ii šaddange. Stivra dohkkehii Sámedikki evttohusa 45 000 euro geavahandárkkuhusas vuoigatvuohtaministeriijai doaimmaheami várás. Sámediggi evttohii, ahte 45 000 euro mieđihuvvo bissovažžan geavaheami várás Sámedikki aitosaš doaibmamii, ee. sámi giellalága ollašuhttimii ja hálddahusa ovddideapmái.

Stivra dohkkehii Sámedikki doaibmačilgehusa 2014 teakstaoasi ruhtadoallodárkkisteaddjiide doaimmaheami várás ja mearridii dohkkehit gárvejuvvon doaibmačilgehusa mildosiiguin čuovvovaš stivrra čoahkkimis. Sámediggi dohkkehii lassin kulturlávdegotti ođđa čoahkkinplána ja mearridii sirdit čanasjoavkodoibmii várrejuvvon mearreruđas 3000 euro kulturlávdegotti čoahkkinbušehttii.

Stivra dohkkehii hálddahushoavdda ráhkadan čilgehusa sámedikki ruhtadoalloáigodaga áigásaš dárkkistusa čoahkkáigeassoraporttas. Stivra lea gieđahallan raportta čoahkkimis 17.2.2015 ja mearridii dalle addit čoahkkáigeassoraporttas addon fuopmášumiin čilgehusa ruhtadoallodárkkisteaddjiide.

Lassidieđuid addá Sámedikki ságajođiheaddji Tiina Sanila-Aikio tel. 050 300 1780, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.