| Sámedikki ovddasteaddjit gallejedje Helssegis deaivvadeamen sierra ministeriijaid virgeolbmuid ja kulturbarggu ruhtadeddjiid |
|
|
Sámedikki ságadoalli Tiina Sanila-Aikio, Sámedikki lahttu ja kulturlávdegotti ságadoalli Tauno Haltta, má. hálddahushoavda Pia Ruotsala ja vs. kulturčálli Riitta Orti-Berg gallejedje Helssegis 5.-7.5.2015 deaivvadit sierra ministeriijaid virgeolbmuid.
Fotogovva Minna Rantala
Prográmmas lei fitnan ee. oahpahus- ja kulturministeriijas, sosiála- ja dearvvasvuođaministeriijas, ruhtaministeriijas ja johtolat- ja dieđihanministeriijas. Dasa lassin sámedikki ovddasteaddjit oahpásnuvve City-Sámit rs:a, Veikkaus:a, Dáidaga ovddidanfoandda, Kone foandda ja Suoma kulturfoandda doaimmaide.
Sámedikki ovddasteaddjit muitaledje sámekultuvrra ja sámegiela dilis Studia Generalias disdaga, miessemánu 5:át beaivve. Sosiála- ja dearvvasvuođaministeriija ja olgoáššiidministeriija virgeolbmot guldaledje ságaid stuorra beroštumiin ja gažadedje ja ságastalle viššalit.
Ruhtaministeriijas ja oahpahus- ja kulturministeriijas ságastallama fáddán lei fas Sámedikki kulturlávdegotti fuolla ng. sámiid kulturmearreruđas, mii ii leat doarvái stuoris. Guovtti maŋimuš jagi kulturmearreruhta leamaš 176 000 euro. Deaivvademiid ulbmilin lei buktit oidnosii stáhta bušeahtas sámegielat kultuvrra ovddideapmái ja sámeservviid doibmii várrejuvvon mearreruđa mearkkašumis sámi kultuvrii.
Fotogovva Minna Rantala
Sámedikki ovddasteaddjit oahpásnuvve City-Sámit rs;a doibmii ja searvvi lágidan giellabeassedoibmii go sii gallededje giellabeassi Mánnu doaibmalanjain Pasilas. Dasa lassin ovddasteaddjit fitne oahpásnuvvamin Veikkaus, Dáidaga ovddidanfoandda, Kone-foandda ja Suoma kulturfoandda doaimmaide. Kulturbarggu mearkkašahtti ruhtadeddjiide sii muitaledje Sámedikki kulturlávdegotti doaimmas ja sápmelaš kulturbargguid birra.
Sámedikki ságadoalli ja má. hálddahushoavda deaivvadeigga vuoigatvuođaministeriijas vuoigatvuođaministtar Anna-Maja Henrikssoniin ja ministeriija virgeolbmuiguin. Báikkis ledje mielde maid várreságadoalliguovttos Heikki Paltto ja Ulla-Maarit Magga ja maid ságadoalli veahkki Inka Saara Arttijeff. Deaivvadeamis ságastalle Sámedikki áiggeguovdilis áššiin ja láhkafidnuin, ee. sámiid giellalága dárkkisteamis. Ságadolliid joavku háliidii giitit vuoigatvuođaministtar Henrikssona su mávssolaš barggus sápmelaččaid buorrin vássán válgaáigodagas. |
|
| Viimeksi päivitetty ( 21.05.2015 ) |