Sámedikki stivra dohkkehii jagi 2014 ruhtadoalloloahpaheami buođusrehkenastimiiguin, balánsaiguin ja daid čuovusdieđuiguin. Lassin stivra dohkkehii doaibmačilgehusa divvumiiguin sihke vuolláičálii ruhtadoalloloahpaheami evttohemiin dáid áššegirjjiid ovttas ruhtadoallodárkkisteaddjiiguin maŋŋá addin ruhtadoallodárkkistančilgehusaiguin  Sámedikki čoahkkima gieđahallama ja nannema várás.

Stivra dohkkehii Sámedikki čoahkkimii evttoheami várás evttohusa sámeoahpahusa ovddideami ja sámegielat oahppamateriálabarggu guoski stáhtadoarjagin jagi 2017 bušeahtas, evttohusa sámi kulturmearreruhtan stáhta bušehtii 2017, evttohusa sámegielagiid sode-bálvalusaid dorvvasteami ja ovddieami várás jahkái 2017 sihke evttohusa sámegielat árrabajásgeassinbálvalusaid dorvvasteami ja ovddieami várás jagiide 2017.

Stivra ságastalai Sámi giellalága ovddidandárbbuin.  Vuoigatvuohtaministeriija lea bivdán Sámedikki čealkit vásáhusain sámi giellalága heiveheamis. Čealkámušbivdda lea oassi vuoigatvuohtaministeriija álggahan sámi giellalága dárkkistanprográmma, man ulbmilin lea árvvoštallat lága doaibmivuođa. Stivra attii ságajođiheaddjái ja gielladorvočállái fápmudusa hábmet loahpalaš čealkámuša.

Stivra dohkkehii sámiid kultur- ja giellabeassedoaimma ruhtadandárbbuid. Sámedikki sosiála- ja dearvvasvuođalávdegoddi lea stivrra mearrádusain válmmaštallan jahkásaččat oktasašbarggus giellabeassedoaibmiiguin ruhtadanohčamušaid ministeriijai. Sámediggi evttoha ruhtadanvuođustusain, ahte oahpahus- ja kulturministeriija hálddahusa suorggis čujuhuvvo sámiid árrabajásgeassinbálvalusaid ja kultur- ja giellabeassedoaimma dorvvasteami várás sihke ovddideami várás oktiibuot 4 790 000 euro, mas 2 400 000 euro sámegielat árrabajásgeassinbálvalusaid dorvvasteami várás oppa riikkas, 170 000 euro sámi árrabajásgeassin - ja giellabeassejođiheaddji virggiid vuođđudeami várás Sámedikki oktavuhtii ja 2 220 000 euro sámiid kultur- ja giellabeassedoibmii.

Stivra ságastalai Sámedikki buolvaprográmmas ja mearridii ášši joatkaválmmaštallama várás. Prográmma ulbmilin lea ovddidit sámiid searvásvuođa Sámedikki doaibmaprográmma válgabadjái 2012–2015 ásahan ulbmila mielde. Buolvaprográmma ulbmilin lea, ahte sierra sohkabuolvvaid (ahkejoavkkuid) dárbbut váldojuvvošedje vuhtii sámedikki doaimmas ja lasihuvvošii sierra buolvvaid gaskasaš dahkamuša. Prográmma lea ráhkaduvvon eará lávdegottiid oktasašbargun, ja das gieđahallojuvvo sierra buolvvaid sierragažáldagat ja dárbbut.

Stivra mearridii Sámediiki oassálastimis Suoma iehčanasvuođa čuohtejagiávvudanjagi  2017 –prográmma válmmaštallamii. Suoma iehčanasvuođa ávvudanjagi temán lea Ovttas, ja ulbmilin lea ráhkadit ealli prográmma stáhtaráđi kansliija jođihemiin ovttas sierra doaibmiiguin.  Ávvudanjagi válmmaštallet mannosaččat čoahkkaneaddji stivra ja jahkásaččat čoahkkaneaddji sáttagoddi. Sáttágottis Sámedikki ovddasta ságajođiheaddji. Stivra mearridii, ahte Sámediggi oassálastá Suomi 100 –ávvudanjahkái temán sápmelaččat, románat ja Suoma iehčanasvuohta. Doaimma plánemii ja ruhtadanohcamuša válmmáštallamii oassálastet Petra Magga-Vars, Riitta Orti-Berg ja Oula Guttorm.

Stivra mearridii rabas ságastallandilálašvuođaid lágideamis anáraččaid áigeguovdilis áššiin. Dárbu viiddis ságastallandilálašvuođa lágideami várás ja Sámedikki aktiiva rolla áššis lea vuolgán anáraččaid Sámedikki lahtuin. Fuollan oidnojuvvo anáraččaid siskkáldas juohkáseapmi, mii lea unnitlogu ealasvuođa dorvvasteami dáfus hui fuolastuhtti. Stivra mearridii, ahte ságastallandilálašvuođa válmmaštallamis vástidit ságajođiheaddji veahkki ja Sámedikki lahttu Anna Morottaja. 

Stivra oahpásmuvai Sámedikki ekonomiija ollašuvvanraportii áigodagas 1.1.–30.4.2015 ja merkii ollašuvvanraportta diehtun. Lassin stivra mieđihii earu Tauno Halttai Nuortalaškulturvuođđudusa stivrras ja válljii Sámedikki ođđa ovddasteaddjin vuođđudusa stivrii Pertti Heikkuri.

Lassidieđuid addá Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi