Govas buot guhtta skuvlen- ja oahppamateriáladoaimmahaga geassehárjehalli: Risten Mustonen, Milla Pulska, Arla Magga, Anna-Katariina Feodoroff, Henna Lehtola ja Solja Magga. Govva Nihkolas Valkeapää.

 

Henna Lehtola studere Oulu universitehtas anárašgiela ávnnasoahpaheaddjin ja lea okta vuosttaš anárašgiela váldoávnnasstuđeanttain. Geassehárjehallamis Henna jorgala vuođđoskuvlla goalmmát luohká matematihka girjji ja gárge vuođđoskuvlla eatnigiela materiálaid. Henna bagadallin oahppamateriálabarggus lea anárašgielat oahppamateriála prošeaktabargi Miina Seurujärvi.

 

Anna-Katariina Feodoroff čálii studeantan jagi 2014 ja lei okta vuosttas olbmuin, geat čađahedje nuortalašgiela eatnigiellan studeantačállosiin. Dál son studere pedagogihka Lappi universitehtas. Anna-Katariina bargá nuortalašgiella vierisgiellan -oahppagirjji logahahkii ja čohkke nuortalašgielat ja nuortalašgillii jorgaluvvon lávlagiid lávllagirjjážin. Anna-Katariina bagadallin oahppamateriálabarggus lea nuortalašgielat oahppamateriála prošeaktabargi Merja Fofonoff, gii lea Miina Seurujärvi ládje skuvlen- ja oahppamateriáladoaimmahaga ođđa bargi.

 

Arla ja Solja Magga čálliba digimateriála giehtačállosa, man soai álggaheigga geassehárjehallamis diibmá. Digimateriálat leat ođđa oassi sámedikki oahppamateriálabarggus. Vuosttas gitta álggu rájes doaimmahagas buvttaduvvon digimateriála boahtá davvisámegiella vierisgiellan -ráidui, mii lea boađi boađi. Ráiddu vuosttas oassi, Gea 1, almmustahttojuvvui dán jagi ja dan lea ráhkadan Oona Länsman. Arla-guovttos Soljain studereba Oulu universitehtas davvisámegiela.

 

Risten Mustonen jorgala ja heiveha davvisámegillii suomagielat ’Tieto, taito & temppu’ -lávdespealu, mii lea juo árabut ilbman anárašgillii. Speallu heive vuollel skuvlaahkásaš mánáide ja nuorra skuvlavázziide. Risten studere Oulu universitehtas davvisámegiela ja matematihka ávnnasoahpaheaddjin. Risten ja Arla ođasmahtiiga geasset 2014 Pekka Lukkari (Biehtár Ántte) 1970-logus almmustuvvan ’Lohkamušak’-girjji dálá čállinvuogi mielde.

 

Milla Pulska beaiváda ja buvttada ođđa dieđuid Oktavuohta -neahttabláđđái, mii gávdno sámedikki ruovttusiidduin. Milla studere davvisámegielat luohkáoahpaheaddjin dáido- ja dáiddalinjjás Oulu universitehtas. Milla lea jearahallan neahttabláđđái Hildá Länsmana, Áile-Risten Holmberga, Mikkâl Morottaja dahje Amoca, Mikkel Näkkäläjärvi, Henna Lehtola ja Niillas Holmberga. Ođđa áššiid sáhttá lohkat neahttabláđis suoidnemánus.