"Balddonasrap" anárašgillii |
![]() |
![]() |
Sáme-rap áhčči, Amoc nappo Mikkal Morottaja, ráppe áitatvuloš anárašgielain, man hubmit gávdnojit dán áigge sullii 350-450. Anárašgiella lea ealáskan maŋimus guovttelot jagi siste erenoamážit giellabeassedoaimmaid geažil, maid bijai johtui Mikkala áhčči Matti Morottaja. Amoca leat gohčodan anáraččaid sáttaolmmožin, muhto ieš son deattuha, ahte leat maid eará olbmot geat barget sin giela ovdii. Mikkal ráppegođii anárašgillii go hálidii geahččaladdat mo dat doaibmá. Ráppen iežas eatnigillii oruinai hui lunddolaš. Musihka ráhkadeapmi ja čállin leat sutnje álgoálggus terapiija. Seammas son beassá geavahit ja ovddidit anárašgiela, mii leage fiinna bonus.
Amoc loaiddasteame Taiga Festiválain 2015 Dávgeváris.
Dalle go suopmarap šattai bivnnuhin 90-logu loahpas, movttáskii Mikkalnai dasa go rap orui leame muhtin ládje álkes musihkkastiila. Sus lei erenomážit beroštupmi teknihkalaš ráppemii ja sániiguin stoahkamii, ja dasa maid ihkenassii sáhttá riimmain duddjot. Amoc ieš lea govvidan musihkkis” balddonasrap”-sániin, ja dakkár dovdamuš vuhtto soames bihtáin. Losses rap lassin Amoc lea goittotge ráhkadan maid lávlagiid mat váldet dovdduide.
Amoc geavaha teavsttainis ollu veardádusaid iige ráhkat nu gohčoduvvon punch-line-rap. Temáide son muhtumin gávdná inspirašuvnna sámi mytologiijas. Dan lassin ahte Mikkal lea sápmelaš ja čállá sámegillii de ii sámevuohta muđui jur dihtto su musihkas. Amoc liiko globála duogášritmmaide iige leat iskan buktit sámevuođa ovdan vaikkoba čuojanasaid bokte. Nuppe dáfus lea dušši suokkardit mii bihtáin lea sápmelaš ja mii fas ii. Amoca mielas sámemusihka dovdá das, ahte dahkki lea sápmelaš. ![]()
Mikkala musihkkaeallimis manná dál bures. Amoc lea dahkagoahtán konsearttaid dál maid ovttas čuojaheaddjiiguin, mii mielddisbuktá ođđa fámuid loaiddasteapmái. Joavkkuin Amoc loaiddasta earret eará Riddu Riđđu –álgoálbmotfestiválain 2015 Davvi-Norggas. Doppe lea maiddái Inger-Mari Aikio bagadallan filmma ”Amoc – vuosmuš” vuosttašeahket. Dan lassin Amocis almmustuvvá geasset 2015 su nubbi album, mii lea johtán bargonamain Faabelit. Mikkala mielas jos veardida ođđa skearru vuosttas skerrui, de das lea čáhppes humora lassin goittot eambbo illu vaikko livččiinai vehá čihkosis. Ođđa album lea máŋggabealat ja doppe gávdno maid akta metállalávlla.
Tevsttalaččat ođđa skearru lea máinnaslaš ja sisttisdoallá oainnuid boahttevuhtii sihke moadde persovnnalaš bihtá. Lyriihkain gávdnojit metaforat, mat čujuhit servodatlaš čuolmmaide máilmmi dásis, muhto muđui son ii leat beroštuvvan sárdnut iige son hálit dahkat politihka. -Mus ii leat áigumuš váikkuhit olbmuid jurdagiidda, dadjá Mikkal. -Vuođđojurdda lea beare dahkat suohttasatdáidaga alccen ja skihpáriidda, ja jos earánai olbmot hálidit guldalit nu dat lea beare buorre ášši.
Liŋkkat: http://www.tuuparecords.fi/amoc https://play.spotify.com/artist/5zkhOMIQEsnM3MjwzXAOWu https://itunes.apple.com/gb/artist/amoc/id257994906 http://riddu.no/se/program/premiere-amoc-vuosmus https://www.youtube.com/watch?v=bCDqAq3S8ws (Amoc: Suomârâp Uarjih) https://www.youtube.com/watch?v=xBHF731DnYY (Amoc: Šaali) https://www.youtube.com/watch?v=bCDqAq3S8ws (Amoc: Kolle aksu)
Teaksta ja govat: Milla Elmiina Pulska |
|
Viimeksi päivitetty ( 01.07.2015 ) |