Áile-Risten Holmberg lea bajásšaddan Ohcejogas ja studeren nuoraid- ja astoáiggebargin Roavvenjárggas. Astoáiggis Áile láve valáštallat ja buđaldit musihkain. Son lávlu ja juoigá juohke beaivve maiddái barggustis mánnádikšun sámegielat beaiveruovttus Roavvenjárggas. Musihkkavástideaddjin son musisere mánáiguin olu ja oahpaha seamma lávlagiid, mat leat báhcán millii su iežas mánnávuođas. –Mánát liikojit hirbmasit lávlut ja leat nu čeahpit, Áile rámida. 

Beaiveruovttus sáhttá ordnet buotlágan doaimmaid go fal geavaha miela ja sámekultuvrra ávkin. Galddažat-joavkkus leat lávluma ja juoigama lassin earret eará duddjon, njoarostan ja fitnan olu tuvrrain. Mánát leat ráhkadan maiddái stággobohccuid, maiguin leat duhkoraddan bigalusa. Gávpogis sáhttá muhtimin leat váttis doalahit sámekultuvrra ja gielladáiddu, dasgo sámegiela ii vealttakeahttá gula gostege. Áile-Ristena bargosaji árgabeaivvis davvisámegiella gullo ja sámekultuvra oidno. Dálá áigge máŋggat sámit  orrot gávpogiin ja Áile-Ristena mielas sámegiela dilli sáhtášii leat Roavvenjárggas buoretge.

 Áile-Risten oassálasttii The Voice Of Finland –gilvvu rátkimiidda, mii lei binnáš balddáhahtti vásáhus. Áile-Risten hálidivččiige roahkasmuvvat loaiddasteamis. Son lea ožžon loaiddastanvásáhusaid earret eará legendáralaš Veijo Länsmana muitokonsearttas geassemánus 2015 Njuorggáma Vuollegeavgŋás. Konsearttas muittašedje Veijo eallima ja čuojahedje su lávlagiid. Áile-Ristena mielas dáhpáhus lei iežaslágan ja doppe lei liekkus dovdu. Boahttevuođas Áile-Risten hálidivččii lávlut eanetge almmolaččat ja dakkár dilálašvuođat sihkkarit vel bohtet.

 Áile-Risten artistan Veijo Länsmana muitokonsearttas geassemánus 2015. 

Liŋkkat:

https://www.youtube.com/watch?v=hi1Zd0Eu1cg (Áile-Risten: Ráhkisvuođa hávdd´al´)

http://www.rovaniemi.fi/fi/Palvelut/Lasten-paivahoito/Paivakodit/Keskusta-Ounasjoen-alue/Sahanperan-paivakoti-ja-Saamenkielinen-paivakoti

http://yle.fi/uutiset/muistokonsertti_nuorena_hukkuneen_saamelaismuusikon_kunniaksi_kesakuussa/7990671

http://yle.fi/uutiset/hirvasvuopio-laiti_veijo_lansman_muitokonsearttas_ii_leat_imas_ahte_su_lavlagat_leat_bahcan_eallit/8055460

Teaksta ja govat: Milla Elmiina Pulska