Mikkel Näkkäläjärvi lea nuorra politihkar eret Anáris. Anár lea su mielde leamaš dorvvolaš ja buot buoremus báiki mánnái šaddat. Unna servodagas lea oahppan birgehallat iešguđetlágan olbmuiguin. Go Mikkel orui Lulli-Suomas de son fuobmái, ahte guhkes mátkkit eai dovdo gostege ja su jurddašanvuogis dihtto davvi lotkatvuohta. Dán áigge Mikkel studere mášenteknihka Lappi ámmátskuvllas, maid son álggii lohkat Vaasas ja de sirdášuvai Roavvenjárgii. Dan lassin son álggahii čakčat 2015 hoavddaoahpuid Lappi universitehtas.

Mikkel searvvai studeantaservviide studeredettiin Vaasas, lei mielde Suoma Sáminuorat rs stivrras ja beroštišgođii politihkas. Son álggii váldit áššiin eanet čielgasa ja fuomášii dan, ahte juos juogá ii leat riekta de dasa sáhttá váikkuhit. Mikkel barggai Helssegis Suoma studeantagottiid lihttu – SAMOK rs:s várreságadoallin jagi 2014. Bargu sisttisdoalai skuvlejupmái ja studenttaid áššiide váikkuheami.... Dan barggus Mikkel oahpai mot mearrádusaid dahkan doaibmá, man dehálaš lea válmmaštallat argumenttaid albma ládje ja mot buktit iežas áššiid ovdan.

Mikkel lea jagi 2015 Suoma YK-nuorradelegáhtta. Son ozai virggi, dasgo lea beroštuvvan maiddái globála gažaldagain. Mikkel doalai sáhkavuoru Suoma beales YK almmolaščoahkkimis New Yorkis čakčamánus 2015. Dáid lassin Mikkel lea Demarinuoraid várreságadoalli 2014-2016. -Orru hui gelddolaš, lohká Mikkel ja lea ilus buot doaimmain ja bargguin, maidda lea beassan.

Anáris orudettiin sámevuohta lei árgabeaivi. Easka go vulggii doppe eret son fuomášii dan mearkkašumi ja dehálašvuođa. Earret eará ruvkkeáittagat bidjet smiehttat sámi álbmoga boahtevuođa ja seailutgo árbevirolaš eallinvuogit. Suomáiduvvan áitá erenomážit gávpotsámiid ja gávpogis lea erenomáš váttis oažžut vuođđobálvalusaid sámegillii. Mikkel ávžžuhage sámiid hupmat eanet gielalaš vuoigatvuođaid ovdii.

Mikkela mielas lea hui dehálaš leat daid bealde, geain ii leat iežas jietna. Dál son lea dahkame iežas niegu duohtan, go beassá váikkuhit áššiide. Stuorimus berošmehttunvuohta lea birrasa duššadeapmi ja Mikkel hálida leat mielde bisseheame dan. Son lea optimista, guhte hálida guođđit boahttevaš sohkabuolvvaide eatnama, mas sáhttá ain eallit. 

Liŋkkat:

http://mikkel.fi/

https://twitter.com/nakkalajarvi

http://demarinuoret.fi/

http://www.ssn.fi/

http://samok.fi/

Teaksta ja govva: Milla Elmiina Pulska