-Mihkâljäävri Áábrámáá Raaija Henna, nuorra nisu muitala iežas nama anárašgillii ja muitališgoahtá eallimisttis. Henna lohká Oulu universitehtas váldoávnnasin anárašgiela ja válmmastuvvá anárašgiela ávnnasoahpaheaddjin. Son lea dutkan anárašnuoraid, ovddeš giellabeassemánáid, gielalaš identitehta. Henna dutkamuša mielde nuorat hálidivčče ovdánit gielain ja hupmat eambbo anárašgiela. Loahppabarggus Henna joatká jáhku mielde seammá fáttáin.

Astoáigge Henna láve duddjot. Son lea duddjon earret eará gávttiid, gahpiriid, silkkiid ja vuoddagiid.  Duodjedáidu ja gáktemálle sirdásit sohkabuolvvas nubbái ja Henna oažžuge duddjonrávvagiid iežas eatnis. Gávttiide čatnasit sierralágan njuolggadusat ja ferte máhttit gudnejahttit árbevieruid. Henna lea bajásšaddan boazodoallobearrašis ja lea mielde boazobargguin álo go astá. –Juos bohccot eai livčče, de in dieđe maid dagašin ja gii livččen. Hennai boazodoallu mearkkaša olu ja son oaidná das boahttevuođa. Boazodollui čatnasa čavga sámekultuvra ja dakkár searvvušvuohta, maid ii Henna mielde sáhte eará sajis vásihit.

  Henna lea jorgalan mánáidgirjjiid anárašgillii. 

Henna lea bargan moadde geasi Sámedikki skuvlen- ja oahppomateráladoaimmahagas. Ovtta geasi son jorgalii mánáidgirjjiid anárašgillii. Jorgaleapmi davvisámegielas anárašgillii lei oalle álki, daningo dat sulastahttet nubbi nuppi. Ruoŧagielas anárašgillii jorgaleapmi lei goit hástaleaddji. Dán áigge anárašgielat mánáidgirjjiid dilli lea oalle buori muttus, muhto nuoraidgirjjit eai leat jur ollenge ja rávesolbmuide gávdno girjjálašvuohta muhtin muddui. Oahppomateriálaid dárbbašit hirbmat olu. Geasset 2015 Henna jorgalii ee. matematihka oahppogirjji anárašgillii. Son lea ilus, ahte oaččui barggu iežas suorggis ja sáhtii bargat sámeservodaga ovdii.

Liŋkkat:

http://www.samimuseum.fi/anaras/anaraskiela/yleistietoa/yleistietoa.html (Anáraččat)

http://www.samediggi.fi/index.php?option=com_content&task=view&id=216&Itemid=254 (Anáraččat)

http://www.samediggi.fi/index.php?option=com_content&task=view&id=158&Itemid=61 (Anárašgielat oahppamateriálat)

http://www.samediggi.fi/index.php?option=com_content&task=view&id=230&Itemid=268 (Sámi gákti muitala máŋgga ášši)

Teaksta ja govva: Milla Elmiina Pulska