Hilda Länsman lea ohcejohkalaš nuorra nisu, guhte bođii olbmuid oidnosii ja gullosii erenomážit Ođđa Musihka Gilvvu (Uuden Musiikin Kilpailu) bokte giđđat 2015. Gilvvu vuoiti ovddastii Suoma Euroviisuin ja Solju oláhii OMG:s njealját saji. Hildá oassálasttii gilvui dovddus sámeartisttain, iežas etniin Ulla Pirttijärvi-Länsmanin. Guoktá gilvohallanbihtá namma lei Hold Your Colors ja das gullui maiddái luohti. Hildá govvida vásáhusa huššan ja fiinnisin. 

Hildá lea bargan musihkain jo unnivuođa rájes, ja son lea bajásšaddan juoiganárbevieruin. Juoigan lea Hildái dehálaš vuohki dovdduid, birrasa ja iežas duogáža govvideapmái. Son ráhkadii vuosttaš luođis 3-jahkásažžan ja vuođđoskuvlaáigge su movttiidahtii musihka bárrii erenomážit musihkaoahpaheaddji Niilo Rasmus. Dál Hildá studere luohkáoahpaheaddjin Sámi Allaskuvllas Guovdageainnus. Son vázzá oktanaga Sámemusihka rávesolbmuidskuvlejupmi –linjá Ohcejogas 2015-2016. –Bággu birget, vástida Hildá, go son smiehttá mo háhppeha astoáiggedoaimmaid lassin vázzit guokte skuvlla. Hildá hálida čiekŋudit eambbo musihkamáilbmái ja áigu álgit boahttevuođas musihkaoahpaheaddjin.

Hildá lea Soljju lassin mielde anárlaš Out Of The Woods –joavkkus. Out Of The Woods ráhkada rock- ja blues-sullasaš musihka, go fas Solju musihkka lea pop. Solju lea ráhkadeame skearru ja bihtát leat eanaš sámegillii. Jurdagat lávlagiidda ja luđiide bohciidit feara makkár diliin, degomat luonddus jođedettiin, biillain vuojedettiin dahje girjji logadettiin. Hildá lea easka álggaheame musihka suorggis ja lea rabas mielain buot vejolašvuođaide. Buot buohkanassii sus lea miella bargat boahttevuođas skearruid ja buktit sámemusihka oidnosii viidáset máilbmái. 

Hildá ja Out Of Woods doallame konseartta Anáris.

Liŋkkat:

https://www.facebook.com/soljuofficial

https://www.youtube.com/watch?v=6G-ihjOuICs (Solju: Hold Your Colours)

https://www.facebook.com/officialoutofthewoods   

https://www.youtube.com/watch?v=vySFefC2SpE (Hilda ja Out Of The Woods LIVE)

http://yle.fi/uutiset/taimen_vihastuu_saameksi_musiikkivideolla/6630557

Teaksta ja govat: Milla Elmiina Pulska