Niillas Holmberg lea máŋggabealát sámeartista Ohcejogas. Son lea musihkkár, diktačálli, neavttár ja tv-jođiheaddji. Niillas oaččui Sámeráđi girjjálašvuođa bálkkašumi jagi 2014 diktagirjjis Amas amas amasmuvvat. Dat čoakkáldat lea evttohassan maid Davviriikkaid ráđi girjjálašvuođabálkkašupmái 2015.

 

Dávjá Niillas speadjalastá iežas dáidagiin sámenuoraid ja sámiid dili. Muhtumin fas son gieđahallá persovnnalaš dovdduid ja vásáhusaid. Niillas oaidná dáidaga bargun boktit dovdduid ja buktit geahččanguovlluid. –Go olbmot vásihit dáidaga, de sidjiide lea dehálaš gávnnat iežas doppe lávlaga dahje divtta siste. Dáidagii gullo dávjá maid politihkka ja maid Niillas iská váikkuhit servodahkii iežas dáidaga bokte.

Niillas ii báze vuordit vai inspirašuvdna badjána muhto čohkkáda vulos ja čálligoahtá. Lávlagat riegádit, go Niillas iská gitárain ja šuoŋat riegádit. Luohti lea earálágan. Dan ii sáhte ráhkadit, baicce juoigi bokte luohti boahtá ovdan. Lávllodettiin lea Niillasa mielde earálágan dovdu go juoiggadettiin. Son beassá dalle dakkár dillái, gos ii dárbbaš jurddašit maidege. Juoiggadettiin lea maid álkit improviseret.

Niillas lea dahkan klassihkalaš musihka komponista, multi-instrumentalista Roope Mäenpääin ovttas guokte skearru. Sudno vuosttaš skearru Manin guottán girjji fárus almmuhuvvui jagi 2011 ja nubbi skearru Assimilašuvdna blues jagi 2014. Niillas muitala, ahte ovttasbargu sudno gaskka lea njuovžil. Soai dahkaba konsearttaid muhtumin maid kvarteahtain, mas čuojahit sudno lassin Teho Majamäki ja Linda Fredriksson.

 

 

  

Niillas lea mielde juoigin maid Asko Keränena ođđa joavkkus, gii lea oahpis 22-Pistepirkko -joavkkus. YLVA-prošeavttas lea boahtime skearru dán jagi bealde. Elektrovnnalaš duogážii leat ovttastahttán ee. trumpeahta ja sierralágan ritmačuojanasaid main šaddet jazz- ja etnodovdamušat. YLVA musihkka lea earálágan go maid Niillas lea ovdal dahkan. Son dadjá, ahte dovdá iežas friijan ja geahpasin go sus ii leat nu stuorra ovddasvástádus joavkkus.

 

Sámenuorat ellet Niillasa mielas guovtti kultuvrra gaskkas ja uhcesii rahtasit. Nuppi gieđas gaiku oarjemáilbmi ja nuppi gieđas sámekultuvra. Lea lossat ja veadjemeahttun máhttit buot, ja háhppehit oktanaga juohke guvlui. Nuorat leat morihan atnit arvvus iežaset duogáža ja gávdnan rámat etnálašvuhtii. Assimilašuvnnas vearrámus ášši Niillasa mielas lea dat ahte álgoálbmogiid iežaset árvvut lotnašuvvet oarjemáilmme árvvuide. Sápmelašvuohta mearkkaša Niillasii ruovttu, vássán áiggi ja boahtte áiggi lassin maid muhtunlágan dáistaleami. 

 

  

Liŋkkat:

https://fi-fi.facebook.com/niillasroope

http://www.tuuparecords.fi/niillasroope

https://www.youtube.com/watch?v=ERYNXPW0ZdI (Niillas Holmberg & Roope Mäenpää: Assimilašuvdna blues)

https://www.youtube.com/watch?v=pbhiXT0z0RA (Niillas Holmberg & Roope Mäenpää feat. Ánne Mággá Wigelius: GÁLLOK)

http://yle.fi/uutiset/niillas_holmbergille_saamelaisneuvoston_kirjallisuuspalkinto/7599119

http://www.norden.org/fi/pohjoismaiden-neuvosto/pohjoismaiden-neuvoston-palkinnot/nordisk-raads-litteraturpris/lehdistoe/ehdokkaat-2015

 

 

 

Teaksta ja meahccegovva: Milla Elmiina Pulska

Konseartagovva: Kevin Francett