Ásllat-Mihku Biehtára ávvučájáhusa beassá geahččat čakčamánu loahpa rádjai Sámekulturguovddáš Sajosis. Čájáhus lea rabas árggain dmu 9 – 17.

65-jahkásaš dáiddar Petteri Laiti gullá sámeduoji bálggesčuolliide. Laiti oažžui duoji ámmátdáiddu iežas soga árbin. Petteri Laiti dadjá iežas šaddan gilvvu vuolahasaiguin jo ruovttus áhči duddjodettiin atnubiergasiid ja eatni duddjodettiin tekstiiladujiid.

Laiti lea okta dain buoremusat dovdojuvvon Suoma beale sámeduojáriin ja son máhttá máŋggabealagit, juoba ođđasisgeavahemiin,  árbevirolaš duddjondáidduid. Laiti lea erenomážit beaggán báhkke- ja čoarvedujiiguin ja maiddái buvkkuiguin, muhto maiddái gárvvistan bohccos ožžojuvvon materiálaid duodjeatnui. Su silbaduojit leat dovddusat erenomážit das, ahte son lea ovttastahttán kreatiivvalaččat silbii árbevirolaš duoji materiálaid ja hámiid. Laiti báhkkeduojit ja sámesilbbat leamašan ovdan máŋggain čájáhusain Suomas ja olgoriikkain.

Laiti lea válmmaštuvvan silbarávdin 1984 ja gárvánettiin son vuođđudii Anárii Átelje Samek. Dál meaštára bázedettiin ealáhahkii, su barggu joatká Sami Laiti. Bárdni lea áhčis oahpahusas gárvánan oahppanduojárin dahjege kisällin ja studeren suorggi maiddái Sámi oahpahusguovddážis (SOG).

Sámekulturguovddáš Sajosis rahppojedje Petteri Laiti čájáhusa mielde čájáhuslanjat sáme dáiddáriid várás. Čájáhusdoaibmagotti ulbmilin lea buktit heivvolaš lasáhusa Sajosa doibmii ja láhčit fiinna rámaid sámedáiddáriidda ja duojáriidda fidnet oidnosii iežaset bargguid. Boahtteáiggis leage sávaldahkan, ahte Sajosis beassat geahččat máŋggaid sámedáiddáriid ja duojáriid bargguid.

Lassidieđut:

Riitta Orti-Berg, vs. kulturčálli, Sámediggi, riitta.orti-berg(at)samediggi.fi,  tel. 010 839 3103, www.samediggi.fi

Johanna Alatorvinen, má. márkanastinhoavda, Sámekulturguovddáš Sajos, johanna.alatorvinen(at)samediggi.fi,  tel. 010 839 3109, www.sajos.fi

Govva:  Sajos/ Terhi Tuovinen