Jagi 2015 Turku álbmogiidgaskasaš girjemeassuid ruovtturiikka temán leat unni, muhto movttegis Kustavi gielda ja máŋggajienat Sápmi. Meassuin Kustavi ja Sápmi ovdanbuktet viidát iežas kultuvrralaš mihtilmasvuođaset. Oidnosii besset dáidagat, diehtagat, girjjálašvuohta, historjá, luondu, luohti/livđe/leuʹdd, máinnasteapmi ja astoáiggedoaimmat. Kustavi vuoruha ovdanbuktit girjjálaš kultuvrra, meara ja suologuovllu, Sápmi fas sámegielaid, girjjálašvuođa ja máinnasárbevieruid.

 

Sápmi lea jagi 2015 girjemeassuid nubbin ruovtturiikka temán prográmmahoavda Jenni Haukio evttohusas. Temá geavatlaš koordináhtor lea Sámeguovllu oahpahusguovddáš, mii čohkke ovttasbargoguimmiid ollašuhttit temáollisvuođa. Sámis ja Kustavis leat meassuin sierra ossodagat. Sámi ossodagas ovdanbuktojuvvojit sámi girjjálašvuohta ja seammás maid sámekultuvra máŋggabealálaččat. Ossodagaid oktavuođas lea Sámi ja Kustavi oktasaš prográmma-/temálávdi, masa sii buvttadit prográmmaid buot golmma meassobeaivvi.

 

Jagi 2015 temát Kustavi ja Sápmi besse oidnosii juo jagis 2014 Turku álbmogiidgaskasaš girjemeassuin 3.10.2014. Rahpandilálašvuođas vásihedje Ailu Valle sámegielat rap -musihka. Päivi Magga ja Eija Ojanlatva doaimmahan Ealli biras – sámi kulturbirasprográmma –girji namahuvvui jagi ruoktoguovlogirjin. ”Iežas giella, iežas miella” lei jagi 2014 áigeguovdilis ságastallama fáddán nuppi meassobeaivve. Panelaságastallamis suokkardalle sámegielaid diliid ja ságastalle dáid boahttevuođa birra.

 

Turku álbmogiidgaskasaš girjemeassut lea golmmabeaivásaš girjjálašvuođa kulturdáhpáhus, mii jagis 2014 čohkkii oktii sullii 700 loaiddasteaddji, sullii 450 prográmmanummira ja čuđiid mielde organisašuvnnaid ja ásahusaid Turku Measso- ja Kongreassaguovddážii. Sullii 23 000 olbmo gallestalle meassuid golmma beaivve áigge.