Sámi Giellagáldu čohkke sámegiela áššedovdiid ja bovde giellageavaheddjiid seminárii Sajosii, Anárii golggotmánu 6. beaivve ságastallat, makkár hástalusat leat njealji sámegiela giellagáhttemis, normeremis ja tearbmabarggus. Seammás lea erenoamáš vejolašvuohta beassat gullat njealji sierra sámegiela.

Giellaseminára oktavuođas čalmmustahtto sámedikkiid golmma jahkásaš rájáid rasttildeaddji giellaovttasbargoprošeavtta álggaheapmi. Seminára rahpá Suoma Sámedikki ságadoalli Tiina Sanila-Aikio. Giellagáldu –joatkkaprošeavtta álggahanseminára lea rabas buohkaide. Oassálastit mákset ieža mátke-, orrun- ja boradangoluid. Seminára dulkojuvvo sámegielain suoma- ja ruoŧagillii.

Bures boahtin!

Báiki: Solju - Sajos, Anár 6.10.2015

Prográmma:

9.30 Káffe

10.00 Álgosánit Sámi Parlamentáralaš Ráđi jođiheaddji/ Suoma Sámedikki ságadoalli Tiina Sanila Aikio

10.15 Norgga Sámedikki presideantta Aili Keskitalo

10.30 Eino Koponen: Giellagáhttema prinsihpaid heivehallan nuortalašgillii

11.10 Johanna Ijäs: Davvisámegiela goallossánit ja daid čállin

11.50 Sámi Oahpahusguovddáža sámemusihkaohppiid musihkkačájáhusat auditorias

12.30 Boradeapmi

13.30 Petter Morottaja: Mot anárašgiela galgá gáhttet?

14.10 Svenn-Egil K. Duolljá: Giellaoahpalaš njuolggadusat julevsámegiela giellanormerema vuođđun

14.50 Marko Marjomaa: Giellagáldu -prošeakta

15.00 Loahpahus

Sámi Giellagáldu lea sámi álbmoga oktasaš ja seammás bajimuš fágalaš áššedovdi ja mearridanorgána sámegielaide guoski gažaldagain. Sámi Giellagáldu fállá giellaveahki ja rávve giellageavaheddjiid sámegielaid geavaheapmái guoski áššiin. Sámi Giellagáldu bargguide gullá terminologiijabargguid ja normerema lassin maiddái giellagáhtten. Dasa lassin Giellagáldu juohká dieđuid sámegielaid birra ja sámegiela fágalaš áššiin.

Giellagáldu -joatkkaprošeavtta ruhtadit EU Interreg V Davvi –prográmma Sápmi –oasseguovlu, Lapin liitto, Romssa fylkkasuohkan sihke Norgga, Ruoŧa ja Suoma Sámedikkit. Prošeavtta jođiha Suoma Sámediggi.