Sámi giellalávgunoahpahusas ohccojuvvojit geavada oahpahanmetodat |
![]() |
![]() |
Sámi giellalávgunoahpahusa ovddideaddji skuvlenfidnu joatkašuvvá 6.-7.11. 2015 geavatlaš temáin. Skuvlenbeivviid áigge guorahallo mii sámegiela oahppamis lea váttis ja makkár bargometodaiguin mánáid lea vejolaš oažžut oahppat ja geavahit giela árrabajásgeassimis, skuvllas ja iešguđetlágan giellabirrasiin.
Bearjadaga prográmmas gullat ee. Ohcejohnjálmmi skuvllas guhká bargan luohkáoahpaheaddji Inga Guttorm (Oahptii Iŋgá) logaldaga, mii vuođđuduvvá Guttorm barggustis ovddidan sámegiela oahppama ja oahpahanmetodaidda ja barggu vásihusaide. Bargometodaid ja vásihusaid gieđahalli logaldagaid dollet maiddái Ohcejogas doaibmi sámegielat luohká oahpaheaddji Aura Pieski ja Oulus bargi sámegielat mánáidgárdeoahpaheaddji Maila Vaarala. Sámi allaskuvllas sámegiela professoran doaibmi Ánte Aikio čielggada logaldagas gažaldaga ´Mii lea váttis sámegiela oahppamis ?´ Fáttá gieđahallá maiddái Eanodagas sámegiela lektoran bargi Berit-Ellen Juuso. Sámegiela oaiveávnnasstuđeanta Magreta Sara fas muitala iežas dutkkusbarggu vuođul sámemánáid vánhemiid davvisámegiela dilis Eanodagas ja Anáris. Lávvardaga 7.11. prográmma álgá Anára skuvllas luohkáoahpaheaddjin doaibmi Petra Kuuva logaldagain, mii gieđahallá anárašgiela giellalávgunmánáid oahpahusgiellan. Sámi oahpahusguovddážis anárašgiela oahpaheaddjin doaibmi Anna Morottaja logaldallá giellalávgunmetodas rávesolbmuidoahpahusas. Anára skuvlla sámegiela oahpaheaddji Elle-Máret Näkkäläjärvi oahpista diehtoteknihka geavaheapmái ja ođđalágan bargometodaidda oahpahusas. Lávvardaga oahpásmuvvo maiddái oahpaheaddjiid sámegielat oahpahusa várás hutkan máŋggaid bargometodaidda ja oahppamateriálaidda. Dákkárat leat ee. eanodatlaš Maarit Magga sámeduoji oahpahusa vuogit, Bealdovuomi skuvllas luohkáoahpaheaddjin doaibmi Hellin Pietikäinen matematihka oahpahusa veahkkeneavvun dahkkon Gárddastallan -speallu ja anárašgiela rávesolbmuidoahpahusas olu geavahuvvon giellameašttir-oahppi-vuohki. Sámi giellalávgunoahpahusa ovddideaddji skuvlen lea Sámedikki ja Oulu universitehta Giellagas-instituhta oktasašfidnu ja bistá dán jagi loahpa rádjai. Jagi 2016 doaibman joatkašuvvá vel sámi giellalávgunoahpahusa gieđahalli resursagirjji doaimmaheapmin. Girjji lea dárkkuhus olggosaddit jagi 2016 áigge. Fidnu ruhtadit oahpahusráđđehus ja Oulu universitehta. Mielde ovttasbarggus leat maiddái Sámi allaskuvla ja Vaasa universitehta. Fidnus leat fárus measta 40 sámegielain bargi árrabajásgeassi, oahpaheaddji ja oahpaheaddjistuđeantta. Skuvlen lea guđa (6) akademalaš oahppočuoggá viidosaš. Oahpahusbargiid skuvlen lea ođđa doaibmasuorgi Sámedikkis. Prográmma 6.-7.11.2015 sáhttá luđet dás. Lassidieđut Sámedikki skuvlen- ja oahppamateriáladoaimmahat/ vs. skuvlenčálli irmeli.moilanen(at)samediggi.fi . |
|
Viimeksi päivitetty ( 22.10.2015 ) |