Nuoraidráđđi lea okta Sámedikki lávdegottiin, man váldobargun lea ovddidit sámenuoraid gielalaš ja kultuvrralaš vuoigatvuođaid sihke nannet sámenuoraid identitehta. Lassin ráđđi válmmaštallá Sámedikki evttohusaid, álgagiid, cealkámušaid ja eará bealiváldimiid, mat gusket sámenuoraid. Nuoraidráđđái gullet dál vihtta 18-25 jahkásaš fásta lahtu ja maiddái juohke lahtu persovnnalaš várrelahttu ja lassin vihtta 15-17 jahkásaš áššedovdilahtu.

Nuoraidráđđi lea bargan Sámediggái evttohusa ráđi lahttomeari bajideamis čieža lahttui ja lahtuid guoskevaš ahkerájá rievdadeami 18-28 jahkái. Nuppástusa maŋŋá áššedovdilahtut válljejuvvošedje eanemustá vihtta. Ášši čoavdá Sámedikki čoahkkin 21.12. Jos ráđi evttohus dohkkehuvvo, válljejuvvojit ráđđái boahttevaš áigodahkii evttohusa mielde 7 fásta lahtu ja maiddái juohke lahttui persovnnalaš várrelahttu. Jos fas ráđi evttohus ii dohkkehuvvo, válljejuvvojit lahttun vihtta 18-25 jahkásaš nuora, nugo dánge rádjai.

Ráđi lahtut eai dárbbaš leat Sámedikki lahtut, eaige sii dárbbaš ássat sámeguovllus. Maiddái sámegiella eatnigiellan ii leat vealtameahttun, muhto sámegiela dáidu lea sávahahtti. Nuoraidráđi válljemis boahtit vuhtiiváldit, ahte lahtut ovddastit nu viidát go vejolaš olles sámeguovllu ja maiddái sierra giellajoavkkuid. Válljemis čuvvo maiddái sohkabeliid gaskasaš dásseárvu.

Nuoraidráđđi bargá Sámedikki stivrai evttohusa vejolaš lahtuin, ja loahpalaš mearrádusa bargá Sámedikki čoahkkin.

Sáhtát evttohit iežat mielas nuoraidráđđái heivvolaš 18-28-jahkásaš aktiivvalaš sámenuoraid ja áššedovdilahttun heivvolaš 15-17-jahkásaš nuoraid. Evttohusaid vuođustusaiguin galgá sáddet Sámedikki nuoraidčállái 11.1.2016 rádjai.

Evttohusat ja lassidieđut:

Kaisa Tapiola-Länsman

kaisa.tapiola-lansman(at)samediggi.fi

+358 50 382 51 79