Čájáhus lokte govaid, filmmaid ja nuoraid dujiid bokte oidnosii dáhpáhusa viiddis mearkkašumi oassin ealás sámekultuvrra. Čájáhus lea johtán Siiddas Ohcejohkii Áilegasdálu ja Turku girjemeassuid bokte Heahttái, gos dasa beassá oahpásmuvvat njukčamánu lohppii. Heahtás čájáhus johtá Vuohččui.

Dáiddadáhpáhusat leat ilolaš dáhpáhusat, maidda ráhkkanit viššalit olles jagi sihke skuvllain ja astoáiggis. Nuoraide leat háliidan fállat dilálašvuođa ovddidit dáidduideaset, čájehit daid earáide ja oažžut ovdanbuktimis máhcahaga duopmáriin sihke stuorra geahččijoavkkus.

Sámenuoraid dáiddadáhpáhusat leat ordnejuvvon 1970-logu gaskamuttu rájes, ja sámediggi lea koordineren ordnemiid jagis 1998. Dáiddadáhpáhus lea Nuorra Kultuvra–fierpmádaga guovlodáhpáhusaid dássásaš gilvvohallan, mas válljejuvvojit ovddasteaddjit giđa riikkaviidosaš dáhpáhussii dahje ng. Skuvllaid stuorrafestii. Dáiddadáhpáhussii bovdejuvvojit buot sámemánát ja nuorat sihke sámegiela dahje sámegielat oahpahusas leahkki mánát ja nuorat.

Dáiddadáhpáhusa váldotemá válljašuvvá riikkaviidosaš dáhpáhusa dánsun-, musihkka- dahje teáhtertemá mielde, ja lassin prográmmas lea juoga erenoamážit sámekultuvrii laktáseaddji temá. Jagiid mielde fárus leamašan govvadáidda, diktagilvu, čuojaheapmi, ráidogovat, oanehisfilmmat, rollabiktasat, gákte- ja duodječájáhusat, juoigan- ja musihkkabargobájit. Jagi 2016 dáhpáhusas Anáris, Sajosis, váldotemán lea teáhter, ja sámetemán bargobájit, main oahpahuvvo ee. dánsun jagi 2017 riikkaviidosaš fáddá mielde.

Sámenuoraid dáiddadáhpáhusa ordnemiin vástida sámedikki skuvlen- ja oahppamateriálalávdegoddi, ja ruhtada Oahpahus- ja kulturministeriija. Skuvlavahku áigge ordnejuvvon dáhpáhus gullá skuvllaid bargoortnegii, nu ahte ordnemiidda oassálastet maid sámeguovllu gielddat.

Lassedieđut: Marjo-Riitta Rantamäki, marjo-riitta.rantamaki at samimuseum.fi, +358 (0)40 571 5670 ja Anni Näkkäläjärvi, anni.nakkalajarvi at samediggi.fi, +358 (0)40 511 1821