Jagi Gielladahku- bálkkašupmi lea nuortalašrátnu |
![]() |
![]() |
Dán jagáš Gielladahku-bálkkašumi lea gođđán nuortalaš Aune Mettäpuro Čeavetjávrris. Bálkkašupmi lea duodji, ceakkogođđinmuoraiguin gođđojuvvon árbevirolaš nuortalašrátnu.
Sámi giellaráđđi mieđiha juohke nuppi jagi Gielladahku-bálkkašumi. Jagi 2015 Gielladahku-bálkkašupmi lea mieđihuvvon Mielenterveystalo.fi-ovttasbargofidnui. Gielladahku-bálkkašumi dárkkuhussan lea addit dovddastusa sámegiela sajádaga ja sámegielat bálvalusaid ovddideami várás dahkkon ánssolaš ja mearkkašahtti barggus Suomas.
”Nuortalašrátnu” lea ovdalis áigge geavahuvvon nuortalaš bearrašis ullogovččasin. Nuortalašrátnu lea oalle liekkas sávzzaulluid dihtii. Mátkái vuolggedettiin omd. ráidduin gerresis dahje sanis, rátnui lei buorre giesastit lieggasii vaikkeba smávva mánáid.
Árbevirolaš nuortalašrátnu gođđojuvvo ceakkogođđinmuoraiguin ja dat gođđojuvvo sávzzaullus snáldduin badnojuvvon ulloláiggiin. Ránu árbevirolaš ivnnit leat vielgat, čáhppat ja ruoksat. Nuortalašránu álggaheapmi čuolddabáttis lea erenomáš; čuožžamat gođđojuvvojit čuolddabáddái masa šaddá nuortalašrátnui mihtilmas ruvttohearva.
Čuolddabáddi giddejuvvo gođđinmuoraid bummai, mas leat ráiggit rátnoálggu giddema várás. Rátnolohppii bárgiduvvojit nuortalašrátnui mihtilmas ng.”rievssatjuolgi”-bárggáldagat.
Dán áigge dát nuortalaččaid árbevirolaš rátnu geavahuvvo eanaš seaidnerátnun.
(Govva: Anni Näkkäläjärvi) |
|
Viimeksi päivitetty ( 25.12.2015 ) |