SPR stivra lea mearridan evttohit SPR ráđđečoahkkimii ja Sámiráđđái ahte Elsa Laula Renberg riegádanbeaivi šaddá almmolaš leavgabeaivin. SPR ráđđečoahkkin lágiduvvo čakčat. –Lea hui dehálaš ahte ášši mearriduvvo ovdal Troanddima 100-jagi ávvudeami, go miihan namalassii čoahkkanit dohko ávvudit su barggu, lohká SPR sátnejođiheaddji Tiina Sanila-Aikio. Ovdal SPR stivrra ášši lea gieđahallan SPR ja Sámiráđi oktasaš lávdegoddi hálddašit ja ovdánahttit sámi čearddalaš dovddaldagaid čoahkkimis geassemánus Girkonjárggas. Lávdegotti mearridii evttohit SPR:i ja Sámiráđđái gudnejahttit Elsa Laula Renberg riegádanbeaivvi.

 

Elsa Laula Renberg (r. 29.11.1877) riegádii Vualtjere suohkanis Ruoŧa beale Sámis jagi 1877 ja jámii tuberkulosaid Musseres Norgga bealde jagis 1931. Renberg čohkkii sápmelaččaid vuosttas riikkačoahkkimii Troanddimii, Norgga beale Sápmái guovvamánus 1917. Dan dihte ávvuduvvo sámi álbmotbeaivvi guovvamánu 6. beaivvi. Olu áššit maid Elsa Laula Renberg ovddidii leat áigeguovdilat ain dál. -Son lea mávssolaš historjjálaš ovdagovvan midjiide. Mun sávan ja jáhkán ahte maŋimuštá 29. skábmamánu 2017 beasan geassit sámeleavgga stággui su gudnin, Sanila-Aikio joatká.

 

Stivra doalvu ášši vel viidáseappot sihke Sámiráđđái ja SPR ráđđečoahkkimii mearridanláhkái. Ulbmilin lea fitnet Elsa Laula Renberg riegádanbeaivvi 29.11. levgenbeaivin jo dán jagi ovdal Troanddin 100-jagi ávvudeami dahje jagis 2017 Troanddin čoahkkima ávvudanjagi.