Sámedikki ságadoalli Juvvá Lemet, Klemetti Näkkäläjärvi, nammaduvvui Sámedikki ovddasteaddjin Lappi lihtu stivrii dan doaibmabadjái, jagi 2008 loahpa rádjái. Várreovddasteaddjin nammaduvvui Sámedikki várreságadoalli Erkki Lumisalmi Anáris. Sámediggi evttoha Lappi lihttui, ahte Sámedikki ovddasteaddjit livčče stivrras dievas lahtut.

Eanangotti ovttasbargojoavkkus Sámedikki ovddasta ohcejohkalaš Veikko Porsanger, várrelahttun Sámedikki sosiála- ja dearvvášvuohtačálli Pia Ruotsala.

Duottar-Sámi eanangoddeláva stivrejoavkkus Sámedikki ovddasta eanodahkalaš badjeolmmoš Juha Magga, várreovddasteaddjin Tuomas A. Palojärvi.

Anárlaš Osmo Seurujärvi nammaduvvui Sámedikki ovddasteaddjin eana- ja meahccedoalloministeriija oktavuođas doaibmi Meahcceráđđái. Seurujärvi várreovddasteaddjin nammaduvvui anárlaš Anu Pietikäinen.

Válljemiid mearridii Sámedikki stivra.