Sámediggi almmuha Sámenuoraid dáiddadáhpáhusa 2008 girjegilvvu bohtosiid ja juohká bálkkašumiid skuvllaid giđđafeasttain.

Sámenuoraid dáiddadáhpáhusa 2008 earenoamáš sámefáddan lei girji, mii galggai juogaláhkái guoskkahit sámi eallima ja kultuvrra. Girjegilvvus eai lean ahkeráját. Mearreáigái bohte oktiibuot 27 iešguđetlágan girjji, main golmmas ledje Power Point –prográmmain ráhkaduvvon davvisámegielat cd-girjjit. Davvisámegielat bábergirjjit bohte 17, anárašgiellagat 4 ja nuortalaš girjjit 3.

Davvisámegielat girjjiid árvvoštalai Ruoŧa sámi dáiddár, girječálli ja oahpaheaddji Inghilda Tapio. Su mielas lei hui váttis válljet vuoitti, go nu máŋggas ledje fiinna ja vuđolaš barggut. Son árvvoštalai girjjiid maid dan vuođul, mo dain sáhtášii almmuhit ja deaddilit “albma” girjin.

Nuoramus mánáid joavkkus bálkáhuvvo Avvila vuolleskuvlla 0-2 luohkáid Máidnasat mánuid mielde. “Hui fiinna girji mii eandalii galggašii deaddiluvvot. Fiinna govat ja “onomatopoehtalaš” čálus dahket girjji hui gelddolažžan. Ja dan mielde lea várra hui álki oahppat mánuid.” Nuppi bálkkašumi dán joavkkus oažžu Anára vuolleskuvlla 3-6 luohká Manin nu lea? Ággán Tapio čállá: “Somas ja gelddolaš muitalusat unnit mánáide. Fiinna, buorit govat mat juo ieža muitalit fearaniid.”

Veháš boarrásut mánáid girjjiin bálkáhuvvojit Gárasavvona skuvlla 6. luohká Ellen-Máret Juuso girjjiinis Geatki ohcá iežas bearráža ja Gáregasnjárgga skuvlla 6. luohká Mánná duoddaris, mas lea “somás muitalus ja fiinna govat. Das lea maid nu gohčoduvvon rukses láigi mii doalvu muitalusa ovddosguvlui”. Ellen-Máret Juuso girji jienastuvvui maid geahččiid favorihttan Heahtás. Tapio mielas girjjis lei buorre muitalus, fiinna govat ja “rukses láigi”. Girjjis lea dehálaš fádda: aktonasvuohta ii leat somá, muhto dat unna geatkkáš goit gávdná olbmáid.

Stuorit mánáid girjjiin bálkáhuvvo Anára vuolleskuvlla 6. luohká girjji Vierccain vuitui. “Dás lea dat nu gohčoduvvon “rukses láigi”. Dan lea álki lohkat ja das leat hirbmat buorit govat. Hui somás muitalus. Beassá boagustit”. Avvila vuolledási 3-6 luohká girji Gonagasa gollit ja stáluid silbbat oažžu maid bálkkašumi erenoamáš dáiddalašvuođa dihte. Dán Tapio mielas galggašii deaddilit earenoamážit oanehis muitalusaid geažil.

Nuortalašgielat girjjiid logai Satu Moshnikoff, guhte lea almmuhan moanaid girjjiid ja bargan hui ollu nuortalašgiela ovdii. Su evttohusa vuođul bálkáhit 3. luohkálaš Juuso Fofonoffa girjji Sää´m jânnan rock´s, mas lea áigeguovdilis fádda ja ollu fantasiija. Čálli lea heivehan máttuin árbejuvvon dáidduid dálá áigái buriin bohtosiiguin. Moshnikoff ávžžuha čálli joatkit girječállima!

Anarašgielat girjjiid árvvoštalai girječálli ja dáiddár Aune Kuuva, gean evttohusa vuođul bálkkašupmi addojuvvo Anára vuolleskuvlla 5-6 luohká oahppiid girjái Lappum uábbi, man leat dahkan Marjut Ahvenlampi, Pekka Moilanen, Riikka Morottaja, Anne Seipiharju ja Jussá Seurujärvi. Girjjis lea buorre ja gelddolaš máinnas ja hui fiinna govat. Máidnasis leat ollut dáhpáhusat ja fantasiija. CD-girjjiid árvvoštalai Sámediggi skuvlen- ja oahppamateriáladoaimmahat. Gilbbesjávrri skuvlla 2-9 luohká girji Olbmot ovdal min oaččui buot eanemus plus-čuoggáid. Girji lea hui kreatiiva, dat rahpá ođđa luottaid ovdanbuktimii ja dahká historjjá geasuheaddjin. Hui buorit govat, ollu buorit ja dáiddalaš ideat ja fiinna ivnnit. Dat lea spontána, miellagiddevaš ja vuđolaš ovdanbuktin, man sihkkarit lei suohtas bargat. Doaimmahaga mielas dat heive temámateriálan historjjá oahpahussii. Minusin sáhttá máinnašit nama, man ferte molsut, dasgo dán nammasaš historjjá girji gávdno juo!

SÁMEDIGGI SÁVVÁ LIHKU JA ČÁLLINMOVTTA BUOHKAIDE NUORRA GIRJEČÁLLIIDE JA HÁSTALA AIN OVDDIDIT ČÁLLINDÁIDDUIDEASET!

SÁMEDIGGI GIITÁ SÁMEOAHPAHEADDJIID BUORI BAGADALLAMA JA MÁNÁID JA NUORAID MOVTTIDAHTTIMA OVDDAS!

Sámediggi sávvá sihke oahppiide ja oahpaheaddjiide buori geasi! Boahtte giđa temáide, mat leat teáhter ja filbma, máhccat čakčat go skuvllat fas álget.