Guttorm lea dikšon virggi dan maŋŋá go ovddeš láhkačálli Heikki J. Hyvärinen sirdášii ealáhahkii mannan čavčča. Guttorm vuittii jienasteamis vuoigatvuohtadiehtaga kandidáhtta Siiri Jomppanen jienaiguin 11-9. Virggi ohce oktiibuot njealjis, geain okta geassádii ovdal válljema.

Sámedikki láhkačálli lea juridihkálaš-hálddahuslaš virgeolmmoš, gean bargui gullá ee. válmmaštallat sámiid vuoigatvuohtadiliide guoski áššiid nugo cealkámušaid, evttohusaid, beali váldimiid, muittuhančállagiid ja muhtumin juoba láhkaevttohusaid. Dasa lassin láhkačálli bargá Sámedikki ealáhus- ja vuoigatvuohtalávdegotti áššemeannudeaddjin ja čállin.

Sámedikki čoahkkin bisttii vuossárgga gitta gaskaija rádjái. Láhkačálli válgga lassin čoahkkin mearridii dán válgabaji doaibmanprográmmas, ekonomiijaplánain ja dohkkehii diimmá rehketdoalu. Eará áššit sirdojuvvojedje boahttevaš čoahkkimiidda.