Bealgi Niillasa mátkkit- animašuvdnaráiddus almmuhuvvojedje oktiibuot 22 anárašgillii jorgaluvvon oasi (Pelgi Nijlâs määđhih 31-52). Animašuvdnafilmmat leat leamaš skuvllaid anus jo ovdal geahččaladdanpreanttusin. Anárašgielat sálmmat ja vuoiŋŋalaš lávlagat (Anarâšlavluuh) almmuhuvvojedje duppal CD:an. Sálmmaid lávlu anárašgielat sálbmajoavku (Ilmari Mattus, Heli Aikio, Ilmari Aikio, Onni Aikio, Unto Aikio, Rauni Mannermaa ja Lyyli Vehmasaho) ja eará vuoiŋŋalaš lávlagiid Rauni Mannermaa.

Nuortalašgillii almmuhuvvui CD-skearru, mas leat oktiibuot 20 girkolaš lávlaga. Daid lávlu nuortalašgielat girkolávlunjoavku (Erkki Lumisalmi, Aulikki Lumisalmi, Anna Lumisalmi, Katri Jefremoff, Seija Sivertsen ja Kirsti Näveri-Bogdanoff). Johannes evaŋgelium (Evvan Evaŋğélium), man lohká Erkki Lumisalmi, almmuhuvvui golmma CD-skearrus.

Davvisámegielat sálmmat, maid lávlu Heahtá sálbmajoavku (Helena Valkeapää, Anni-Marja Valkeapää, Ilmari Laiti, Wimme Saari, Marie Kvärnmo-Valkeapää ja Niko Valkeapää), almmuhuvvojedje vihtta CD-skearru. Dasa lassin almmuhuvvui okta CD-skearru, mas lávlu Ohcejoga sálbmajoavku (Janne Aikio, Annukka Hirvasvuopio-Laiti, Jenna Rasmus ja Niilo Rasmus) ja okta CD, mas lávluba Annukka Hirvasvuopio-Laiti ja Janne Aikio. Sálmmat leamaš skuvllaid anus juo ovdal geahččaladdanveršuvdnan. Davvisámegielat máinnasráidu Lodderáidalas, man Siiri Miettunen ja Ritva Torikka leaba ráhkadan skuvlaradioi jagi 1989, almmuhuvvui guovtti CD-skearrus. Ráidui lea fidnemis maiddái bargogirji.

Guovdageaidnolaš Anders Pedersen Bär (Máiza-Bier Ánde) muitalusat almmuhuvvojedje CD-skearrus, masa daid lea davvisámegillii lohkan Tuomas Magga (Guhtur-Niillas Tuomis). Dát materiála heive siidomateriálan sihke eatnigiela, historjjá ja oskkoldaga oahpahussii. Máiza-Bier Ánde čálii iežas eallima muitalusaid 1800-logu gaskamuttu maŋŋá Åkershus giddagasas, gosa lei dubmehallan n.g. Guovdageainnu stuimmiid geažil. Skuvlla birasdiehtu 3-oahppogirji almmuhuvvui davvisámegielat jorgalussan, man lea sámegillii jorgalan Jovnna-Ánde Vest.

Ođđa ja ovdal almmuhuvvon oahppamateriálaid sáhttá diŋgot sámedikki skuvlen- ja oahppamateriáladoaimmahagas. Materiálat addojuvvojit skuvllaide nuvttá