Prográmma ulbmilin lea oasistis ovddidit sámiid gielalaš ja kultuvrralaš vuođđorivttiid ollašuvvama iešstivrejumi vuođul. Sámit galget sáhttit boahttevuođasge eallit ja ovdanit iežas álbmogin, iežas vuolggasajiid vuođul, suddakeahttá váldoálbmogii. Dát eaktuda sámegillii ja sámi kultuvrii vuođđuduvvi bálvalusaid lasiheami ja daid sisdoalu ovddideami.

Sámiid bálvalusaid ovddideamis deattuhuvvojit boarrásiid bálvalusat, arrabajásgeassin, sosiálabargu, psykososiála bálvalusat, mánnárávvehatdoaibma, eallindiliid ja sosiála dorvvu ovddideapmi. Sámediggi figgá dasa, ahte ovddidanprográmma doaibmabijut šattašedje sihke sámedikki iežas doaibmaprográmmaid ja sámeguovllu gielddaid ja eará dán suorggi ovddidanorganisašuvnnaid doaibmaprográmmaid oassin.

Sámediggi lea šaddan dehálaš sosiála- ja dearvvášvuođasuorggis doaibmi orgánisašuvdna jagi 2002 rájes go dasa vuosttaš geardde čujuhuvvui earenoamáš stáhtaveahkki sámegielat sosiála- ja dearvvášvuođabálvalusaid buvttadeami várás. Sámediggi ruhtada stáhtavehkiin sámeguovllu gielddaid sámegielat bálvalusaid.