Davviriikkaid sámedikkit dikšot Sámi parlamentáralaš ráđi ságadoalli bargguid vurrolágáid guokte jagi hávil. Vástu čállingotti doaimmas čuovvu ságadoallibarggu.

Govas Suoma sámedikki ságadoalli Juvvá Lemet, Klemetti Näkkäläjärvi, Norgga sámedikki ságadoalli Egil Olli ja Ruoŧa sámedikki ságadoalli Lars Ándde Bær.

Suoma sámedikki ságadoalli Klemetti Näkkäläjärvi (Juvvá Lemet) deattuhii dievasčoahkkimis doallan sáhkavuorustis SPR mearkkašumi earenoamážit dál go stáhtat ja sámedikkit leat ovttasráđiid válmmaštallamen davviriikkalaš sámekonvenšuvnna fápmui buktima. Davviriikkalaš sámekonvenšuvnna dohkkeheapmi Suomas, Norggas ja Ruoŧas lea okta Sámi parlamentáralaš ráđi váldoulbmiliin doaibmabajis 2008-2010.

Álgoálbmogiid vuoigatvuođat leat guovddáš sajis Sámi parlamentáralaš ráđi barggus. Sámedikkit leamaš aktiivvalaččat fárus ovddideamen mannan jagi (2007) ON generalčoahkkimis dohkkehuvvon álgoálbmotjulggaštusa. Parlamentáralaš ráđi ovddasteaddjit leat maiddái oassálastán ON álgoálbmotáššiid bissovaš foruma (UN Permanent Forum on Indigenous Issues) čoahkkimiidda SPR:a vuođđudeami, 2000-logu álggu rájes.

Sámi parlamentáralaš ovttasbarggu dehálaš ulbmilat leat maiddái sámegillii guoski láhkaásaheami harmoniseren iešguđet riikkain, sámi giellaovttasbarggu ođđasisorganiseren, sámeoahpahusa nannen earenoamážit vuođđoskuvllas, oahppamateriálaovttasbarggu ovddideapmi ja sámenuoraid oassálastin- ja vaikkuhanvejolašvuođaid buorideapmi. Sámi allaskuvlla ovddideapmi sámi universiteahttan gullá maiddái parlamentáralaš ráđi váldoulbmiliidda.

Sámi giellalávdegoddái, mii jođiha sámi giellaovttasbarggu ja mas leat ovddasteaddjit buot sámegielain, nammaduvvojedje jagiide 2008-2011 Suoma sámegielaid ovddasteaddjin: davvisámegiella Vesa Guttorm (várrelahttu Petra Biret Magga), anárašgiella Petteri Morottaja (Ilmari Mattus), nuortalašgiella Erkki Lumisalmi (Jouni Moshnikoff).