Soahpamuša joatkkaválmmaštallamii gullevaš bargu lea ádjánán, go Suopma lea gártan bidjat ovdasadjái sámiid ruovttuguovllu stáhtaeatnamiid geavaheapmái laktáseaddji álbmotlaš fidnu válmmaštallama. Mearriduvvui goittotge, ahte Davviriikkalaš sámesoahpamuša guoskevaš proseassa jotkojuvvo Norgga ságajođiheaddjiáigodagas 2009 dan láhkai, ahte čielggaduvvo mo vejolaš soahpamušráđđádallamiid galggašii geavatlaččat ollašuhttit.

Norgga, Ruoŧa ja Suoma gaskasaš soahpamuša ulbmilin lea ráhkadit sámiid rivttiid guoskevaš ovttalágan davviriikkalaš muddema. Soahpamušas livčče mearrádusat earret eará sámiid iešmearridanvuoigatvuođas, ovttasbarggus sámedikkiid ja stáhtaid gaskkas, sámiid gielalaš ja kultuvrralaš vuoigatvuođain ja maiddái ealáhusain.

Ruoŧa ovddasteaddjin čoahkkimis lei eanadoalloministtar Eskil Erlandsson. Sámedikki ovddastedje ságajođiheaddjit Egil Olli Norggas, Lars-Anders Baer Ruoŧas ja Klemetti Näkkäläjärvi ja Irja Seurujärvi-Kari Suomas. Norgga bargo- ja integrášuvdnaministtar Dag Terje Andersen ii sáhttánge oassálastit čoahkkimii girdinoktavuođaid váttisvuođaid dihtii.