Bálkkašumi jugii vuoigatvuohtaministtar Tuija Brax sámeáššiid ministtariid ja sámedikki ságajođiheaddjiid čoahkkima oktavuođas. Vuoigatvuohtaministtar Brax lassin báikki alde ledje Ruoŧa eanadoalloministtar Eskil Erlandsson ja maiddái sámedikki ságajođiheaddjit Egil Olli Norggas, Lars-Anders Baer Ruoŧas ja Klemetti Näkkäläjärvi Suomas.

Juohke nuppi jagi juhkkon giellabálkkašupmi mieđihuvvo ovttaskasolbmuide dahje ovttastumiide Norggas, Ruoŧas, Suomas dahje Ruoššas sámegiela ovddideamis.

Sámi Siida -searvi ánssášii bálkkašumi guhkálas barggus sámegiela buorrin Ohcejoga gielddas. Searvi lea dovdomassii váikkuhan sámegiela sajádaga buorideapmái Ohcejogas. Searvi lea maiddái álot prioriseren sámegiela doaimmainis. Ovdamearkan mánáide ja nuoraide dárkkuhuvvon doaimmas sámegiella lea áidna geavahuvvon giella. Bálkkášumi válddii vuostá Sámi Siidda ságajođiheaddji Kati Eriksen.

Ruoŧa sápmelaš Henrik Barruk lea nannen guovttelogi jagi áigge measta jávkamin leamašan ubmisámegiela Ruoŧas. Barruk lea doaibman guhká ubmisámegiela oahpaheaddjin. Lassin son lea ee. bargan dokumenterenbarggu ja buvttadan teavsttaid, sátnerájuid ja sojahanmálliid ubmisámegiela oahpahusa várás.

Gollegiella-giellabálkkašumi ulbmilin lea duvdit sámegiela ovddideami dahje seailuma Norggas, Ruoŧas, Suomas ja Ruoššas. 12 500 euro sturrosaš bálkkašumi sáhttá juohkit máŋggaid vuoitiid gaskkas. Bálkkašupmi juhkkui vuosttas háve jagis 2004. Suomas dán jagi juhkkon bálkkašumi ruhtadedje oahpahusministeriija ja vuoigatvuohtaministeriija.