Sámegiella lea ovttadássásaš giella dárogielain Norggas. Vuoigatvuohta sámegiela oahppamii skuvllas gullá oahpahuslága mielde juohke sámeoahppái beroškeahttá ássanbáikkis. Sámegiela hálddašanguovllus sámegillii ja –kultuvrii laktáseaddji vuoigatvuođat oahpahusas leat viidásabbot go eará osiin riikkas.

- Norgga ráđđehus ollašuhttá aktiivvalaš sámepolitihká, man vuođđun leat vuođđolága ´sámeparagráfa´ (§ 110 a), jagis 1987 mearriduvvon sámeláhka ja álbmogiidgaskasaš bargoorganisašuvdna ILO:n soahpamuš nr 169. Valle mielde sámiide guoski skuvlenpolitihkká lea heivehuvvon vástidit ILO-soahpámuša gáibádusaid.

ILO-soahpámuša mielde oahpahusprográmmat ja skuvlenfálaldagat galget plánejuvvot ja ollašuhttojuvvot ovttasráđiid álgoálbmogiin. – Go ođđa oahpahusláhka bođii fápmui jagi 1999, de sámediggi oaččui eambbo dadjamuša ja ovddasvástádusa ee. ráhkadahttit oahppoplánaid vuođđoskuvlla sámeohppiide. Sámediggi ráđđádallá oahppoplánain máhttodepartemeanttain, mii mearrida plánain.

- Oahppaplánabargguid lassin sámedikkis lea ovddasvástádus oahpponeavvoovddideami doarjjaortnegiid hálddahusas ja ovddideamis, muitalii Valle. Praktihkas dat oaivvilda oahppamateriálaváriid hálddahusa ja juohkima, materiálabarggu čuovvuma ja pedagogalaš bagadallama.

- Sámegiela ja sámi oahpahusáššiid ovddideapmi lea ođđa luottaid boltunbargu. Ráđđehus lea addán vihtta stuorradiggedieđáhusa maŋimuš guovtte jagis. Dáin stuorradiggedieđáhusain golbma gieđahallet oppalaččat skuvlla oahpahusa. Guokte dáin dieđáhusain gieđahallet erenoamážit sámegielaid ja Norgga sámepolitihká, muitalii Valle.

Stáhtačálli Raimo Valle sáhka lohkan láhkái dás Stáhtačálli Raimo Valle Helssegis 13.11.2008ja Statssekretær Raimo Valle 13.11.2008 Helsingfors