Girkus lea čađat leamašan stuorra mearkkašupmi sápmelaččaide ja sámegiela geavaheapmái. Ovdal almmolaš oahppogeatnegasvuođaskuvlla áiggi álbmotoahpahusas vástidii girku ja sámegielat girjjálašvuohta álggii girkolaš teavsttain. Dán áiggi sámegiella gullá lunddolaš oassin girku doibmii. Girkolaš doaimmahusat degomat gásta, vihaheapmi ja hávdádeapmi sáhttet doaimmahuvvot anáraš- ja davvisámegillii.

Girkolaščoahkkin vuođđudii giđđat 2008 sámebarggu čálli virggi, man sajuštanbáikin lea Oulu bismagotti duopmokapihttal. Sámebarggu čálli virgi lea ollesgirku virgi, man bargun lea sápmelaččaid girkolaš barggu ja iešguđetlágan fidnuid koordineren ja dan lassin Barentsa guovllu sámiid girkolaš oktavuođaid dikšun. Sámebáhpa virgebáiki lea Anára searvegottis, muhto su bargogieddin lea olles sámiid ruovttuguovlu. Sámebáhpa bargun lea bálvalit sámiid ruovttuguovllu searvegottiid ja fállat sámegielat girkolaš bálvalusaid.

Oulu bismagotti duopmokapihttal vuođđudii sámebarggu ráđđádallangotti jagi 2008. Ráđđádallangotti bargun lea ovddidit sápmelaččaid girkolaš barggu ja duvdit sámebarggu čálli barggu áššedovdiorgánan. Girku bargá sámebarggu olis davviriikkalaš ovttasbarggu ja ordne ee. juohke njealját jagi ekumenalaš Sámi girkobeivviid. Čuovvovaš girkobeaivvit ordnejuvvojit Norgga Mo I Ranas 9.-11.8.2013.

Sámi giellaláhka guoská maiddái girku ja earenoamážit Oulu bismagotti. Jagi 1994 fápmui boahtán girkoláhkii čállojuvvui njuolggadus mii guoská dán. Jagi 2006 ođaduvvon njuolggadusain sámeguovllu searvegottit meroštallojuvvojedje čielgasit guovttegielat searvegoddin. Dát geatnegahttá sámegielaid oidnot maiddái ovdamearkka dihtii girkolaš almmuhusain.

Sámegielat girjjálašvuohta

Girku virggálaš girjjiid, degomat ipmilbálvalusgirjji ja doaimmahusaid girjji, jorgališgohte sámegillii 1990-logus ja dat gárvvásmuvve 2002. Davvisámegielat sálbmagirji almmustuvai jagi 1993. Davvisámegielat Ođđa Testameantta jorgalus almmustahttui jagi 1998. Davvisámegielat Boares Testameantta jorgalusbargu álggii 1998 ja bargu joatkašuvvá ain. Mánáid biibbal lea almmustahtton davvisámegillii ja anárašgillii. Anárašgielat sálbmagirji almmustahttui jagi 1993 ja oasit Girkogiehtagirjjis jagi 2000. Maiddái Káhtekismmos lea jorgaluvvon anáraš- ja davvisámegillii. Duopmokapihttala plánain lea Girkogiehtagirjji jorgaleapmi anárašgillii.

Sámegielat bálvalusaid oažžun girkolaš doaimmahusaid, degomat hávdádusaid, gástta ja vihaheami oktavuođas lea vejolaš sámiid ruovttuguovllus, mii lea sámebáhpa doaibmanguovlu. Sámegielat ja guovttegielat meassut doaimmahuvvojit Anára ja Ohcejoga guovlluin. Sámiid ruovttuguovllus ii leat vejolašvuohta oažžut sámegielat bálvalusaid diakoniijabarggu ja bajásgeassinbarggu olis, daningo eai gávdno sámegielat bargit. Danin ovdamearkka dihtii sámegielat rihppaskuvla ii ollašuva Suomas. Sámegielat bargiin lea vátnivuohta.

Sámegielat girkogiehtagirjjit gávdnojit čujuhusas  www.sakasti.fi

Sámegielat biibbal gávdno čujuhusas www.bibeln.fi