Suoma Sámi Nuorat |
![]() |
![]() |
Suoma Sámi Nuorat lasiha oktiigullevašvuođaSuoma Sámi Nuorat rs álggahuvvui 1991 doarjut aktiivvalaš sámenuoraid doaimma ja ráhkadan dihte sámenuoraide vejolašvuođa váikkuhit nuoraid áššiide. Suoma Sámi Nuorat lea riikkaviidosaš nuoraidsearvi, mii ordne dáhpáhusaid, deaivvademiid, konsearttaid, kurssaid ja ollu eará. Dat váldá politihkalaččat beali áššiide, mat gusket sámenuoraide, lea mielde mearrádusaiddahkamis ja viggá váikkuhit eamiálbmogiid ja earenoamážit eamiálbmotnuoraid guoski áššiide.
Searvvi ulbmilin lea váikkuheami lassin nannet sámenuoraid identitehta ja kulturdovdamuša ja ráhkadit fierpmádagaid eará sámenuoraid servviiguin ja eamiálbmotnuoraiguin. Davviriikkalaš ovttasbargu leage leamašan earenoamáš ollu; Ruoŧa Sáminuorra-servviin leat stáđásmuvvan gaskavuođat, ja oktasaš njealji riikka nuoraidsearvi lea barggu vuolde.
Suoma kultuvra- ja oahpahusminister Stefan Wallin rabai Suoma Sámi Nuorat rs ja Suoma Sámedikki nuoraidráđi dilálašvuođala (side event) eamiálbmogiid bisseváš foruma oktavuođas New Yorkis 2012.
Suoma Sámi Nuorat -stivrras leat vihtta aitosaš ja vihtta várrelahttu. Stivrra ságadoallin válljejuvvui cuoŋománus 2012 juo čihččet geardde Tuomas Aslak Juuso, Gáijjot Ánte Issáha Duommá, gii lea 28-jahkásaš badjealmmái Giehtagierragis. SSN:a doibmii son šattai fárrui 2000-logu álggus go “guokte Anára olbmá, Paltto ja Länsman, dohppiiga mielde Doaivonjárggas”, gos Juuso váccii dalle boazodoalloskuvlla. Tuomas Aslak válljejuvvui 2008 historjjá nuoramus evttohassan Suoma Sámediggái, muhto jagit leat dolvon su fárrui riikkaidgaskasaš politihkkii ja dáid áiggiid son lea ON:a eamiálbmogiid foruma riikkaidgaskasaš eamiálbmotnuoraid juhkosa ságadoallin.
Várreságadoallin lea Anne-Maria Magga. Eará stivralahtut leat Aletta Lakkala, Unna-Maari Pulska ja Sara Wesslin. Várrelahttun leat Mikkel Näkkäläjärvi, Rosa-Máren Magga, Aslak Holmberg, Leena-Maaret Niittyvuopio ja Ida-Maria Helander.
Govas Tuomas-Aslak Juuso, Sara Wesslin ja Sauli laiti.
Govas SSN stivralahtut Ida Helander ja Aletta Lakkala New Yorkis.
Govas Aslak Holmberg ja Unna-Maari Pulska Rákkasordas sámenuoraid deaivvadeamis.
Govas SSN nieiddaid joavku, mii vuittii golli sámemeašttirgilvvuin Upmis. Govas gurut bealde duohkin Rosa-Máren Magga, Elli-Marja Hetta, Anni Koivisto ja Anne Halonen. Ovddas gurut bealde Anna-Katariina Feodoroff, Leena Niittyvuopio, Karen-Anni Hetta, Sari Sarre, Laura Niittyvuopio ja Unna-Maari Pulska.
SSN ollašuhttá prošeavttaid ja sádde ovddasteaddjiid riikkaidgaskasaš konfereanssaideSuoma Sámi Nuorat lea ordnen iešguđetlágan doaimmaid ja lasi leat plánaid vuolde. Doaimmat, mat leat eanemus leamašan oidnosis maŋimuš jagiid leat golggotmánus 2008 TV-ođđasiinge oidnon gáktemiellačájáhus ja oassálastin salibandy sámemeašttirgilvvuide mat čohkkejit ollugiid oktii.
Jagi 2007 SSN lei ordnemin stuorát Gávnnadeapmi-čoahkkaneami. Dalle máŋggat sámenuorat Suomas, Norggas ja Ruoŧas čoahkkanedje ságastallat sámenuoraid boahttevuođa birra sámepolitihkas ja -servodagas. Searvi lea oassálastán maiddái máŋggaide earáge riikkaidgaskasaš semináraide, maiddái sámeguovllu olggobealde. Ovdamearkka dihtii 2012 SSN ordnii ovttas sámedikki nuoraidráđiin ja Suoma olgoministeriijain New York UNPFII (United Nations Permanent Forum on Indigenous Issues) oktavuođas siidodáhpáhusa nuoraid váikkuhanvejolašvuođain.
Dán stivrabaji stuorámus fidnu lea leamašan searvvi ođaduvvon neahttasiiddut, main lea ulbmilin rahpasit loahppajagi 2012. Neahttasiiddut bálvalit SSN guovddáš ulbmiliid, maidda gullá sámenuoraid olaheapmi riikkaviidosaččat ja searvvi doaimmain dieđiheapmi. Boahttevuođas SSN pláne earret eará Gávnnadeapmi 2:ža Ruoŧa ja Norgga beale sámenuoraid servviiguin ja áigu álggahit rekryterenkampanja, man dárkkuhussan lea dahkat SSN doaimma čađačuovgin ja geasuheaddjin nuoraid čalmmiin.
Suoma Sámi Nuorat rs stivra doallá iežas blogga, man bokte dieđihuvvo searvvi prošeavttain, dáhpáhusain ja áššiin main SSN lea leamašan fárus. ![]()
Liŋkkat:
|
|
Viimeksi päivitetty ( 11.11.2013 ) |