Bálkkašupmelávdegotti mielde evttohus lea doaimmaid dáfus čoavddusin beaktil ja ovddidandohkálaš ja evttohus deavdá buoremusat gilvui biddjon hástaleaddji mihttomeriid.  Gilvvus juhkkojedje oktiibuot golbma bálkkašumi, lodnujuvvui okta evttohus ja mieđihuvvojedje guokte gudnemáinnašumi.

Gilvobargu lei erenomáš miellagiddevaš ja hástaleaddji, go dasa laktásedje  maŋimuš áiggiid riikkaidgaskasašge arkitektuvraságastallamis ovdan leamašan máŋggat fáttát, nugo báikkálašvuođa ovdanbuktin, mas oidnojit báikki erenomáš luondo-, duovdda- ja dálkkádatdilit, ja maiddái sámi kulturárbevieru iešlági ovdanbuktin, ja lassin ekologalaččat vuogas huksenvuogi oččodeapmi.

Vaikke plánenbargu leige váttis, gilvu buvttii bálkkašupmelávdegotti mielde ovdan earálágan ja miellagiddevaš lahkonanvugiid Sámi kulturguovddáža plánemii. Erenomáš váttisin šattai Davvi-Sámi lundui ja Anára giligovvii heivvolaš huksenhámi ovddideapmi ja maiddái sámi kulturárbbi hápme- ja miellagovvamáilmmi ovdanbuktin otná beaivve arkitektuvrras. Ovdalis máinnašuvvon oainnuid lassin bálkkašupmelávdegoddi giddii árvvoštallamis fuopmášumi gilvoevttohusaid doaibmankvalitehtii, ollašuhttinvejolašvuhtii, ekonomalašvuhtii ja maiddái bistevaš ovdáneami prinsihpaid ollašuvvamii. Gilvvus vuosttas sadjái bajiduvvon ja ollašuhttima vuođđun válljejuvvon evttohus lea dálu doaimmaid dáfus čoavddusin beaktil ja ovddidandohkálaš, ja dat deavdá buoremusat sierragáibádusaid, mat bohtet ovdalis namuhuvvon huksenbáikkis ja doaibmagovas.

Guovtte oasat gilvu geasuhii

Gilvvu vuosttas oassi gevvui idealundosaš gilvun kulturguovddáža arkitektonalaš ja doaibman- konsepti gávdnama várás, ja dasa guđđojedje 58 evttohusa. Gilvvu nuppi oassái, mii álggii 1.9.2008 ja nogai 3.10.2008, bálkkašupmelávdegoddi bovdii vuosttas oasi vuođul guhtta evttohusa. Nuppi oassái bovdejuvvon gilvvohalliide sáddejuvvojedje evttohusa guoski árvvoštallan ja plána buoridanrávvagat. Lassin evttohusain mihtiduvvojedje guktuid osiin viidodatdieđut ja rehkenastojedje huksengolut. Nuppi oasi evttohusa buoridettiin gilvvohalliin lei vejolašvuohta ráđđádallat anonymalaččat gilvvu lágideaddji nammadan goasttádusrehkenastiiguin. Nuppi oasis evtttohusat ledjege illudahtti láhkai lávgagut ja huksengoluid dáfus hálbbibut.

Dieđut kulturguovddášfidnu birra

Sámit ožžot Anárii iežaset kulturguovddáža, man ulbmilin lea láhčit sámiide buoret eavttuid iešráđálaččat doalahit ja ovddidit kultuvrra, giela ja servodateallima, dikšut ja ovddidit gielalaš ja kultuvrralaš iešráđđema ja maiddái doarjut sámiid dábálaš eallindiliid ovdáneami.  Lassin ulbmilin lea buoridit vejolašvuođaid juohkit ja oažžut dieđuid sámiin eamiálbmogin.   

Sámi kulturguovddážii ráhkaduvvojit lanjat sámekultuvrra doaimmaide, Sámedikki hálddahussii ja maiddái sámi oahpahus- ja dutkandoibmii. Kulturguovddáža guokte váldogeavaheaddji leat Sámediggi ja stáhta oahppolágádus Sámi oahpahusguovddáš.  Lassin guovddážii bohtet lanjat Anára gieldda girjerádjodoibmii, sámeservviide ja Lappi leanaráđđehussii. Kulturguovddáža bruttoviidodat, ns. ollesviidodat lea 4 670 njealjehasmehtera. Vistti válmmaštuvadettiin doppe barget 64 olbmo.  Čoahkkin-, ráđđádallan-, girjerádjo- ja medialanjat bohtet bálvalit dovdomassii stuorát fidniid meari. Huksenfidnu goasttádusárvu lea sullii 11,5 miljovnna euro. Lappi leanaráđđehus lea juolludan fidnui 5 milj. euro EU-ruhtadeami.  Kulturguovddáža hukseha Senaatti-kiinteistöt.  Ieš plánen álggahuvvo ođđajagemánus 2009 ja huksenbarggut álget giđđat 2010. Plánaid mielde visti váldojuvvo geavahussii jagi 2012 áigge.

Lassidieđut

Huksenfidnu ja arkitektuvragilvu: jođiheaddji áššedovdi Marjatta Erwe, Senaatti-kiinteistöt,

t. +358 40-503 8389,  http://www.senaatti.fi/

Sámi kulturguovddáža doaibma: hálddahushoavda Juha Guttorm t. +358 400-142 518   http://www.samediggi.fi/