Oanehisfilbma lea dáiddadáhpáhusa temán dál vuosttaš gearddi. Mini-filbmafestiválas čájehuvvojit nuoraid maŋimuš guovtti jagi áigge dahkan sámegielat oanehisfilmmat. Máŋggain skuvllain lea ordnejuvvon mediaskuvlejupmi, man boađusin nuorat leat beassan ráhkadit filmmaid. Skuvlejupmi ii leat goittotge ordnejuvvon buot sámeguovllu skuvllain ja dan dássi leamaš iešguđetlágán. Dán dihtii filmmat čájehuvvojit Vuohču dáhpáhusas mini-festiválan, eaige gilvun.

Riikkadási Nuorra Kultuvra-dáhpáhusa temán lea teáhter ja dáhpáhus ordnejuvvo Lappeenranta-gávpogis 22.-24.5.2009, lassedieđut www.nuorikulttuuri.fi . Njuolggádusaid mielde riikkadási dáhpáhussii lea vejolaš sáddet ovtta sámenuoraid ovddasteaddji (omd. joavkku).

Sámenuoraid dáiddadáhpáhus lea jahkásaš, vurrolágáid sámiid ruovttuguovllu gielddain ordnejuvvon dáhpáhus. Dan váldoordnejeaddjin bargá sámedikki skuvlen- ja oahppamateriáladoaimmahat. Dasa lassin maiddái báikkálaš skuvllain ja sámi servviin lea stuorra rolla ordnemiin.

Sámediggi ordne biilasáhtuid dáhpáhussii ovddit vuogi mielde sierra guovlluin sámeguovllus. Dáhpáhus lea rabas maiddái ruovttuguovllu olggobealde boahtti oasseváldiide. Biilasáhtuid goasttideapmi ruovttuguovllu olggobealde lea gitta das man ollu oahpahusministeriija addá dáhpáhusa várás stáhtaveahki. Dáhpáhusas fállojuvvo maiddái skuvlamális buohkaide oasseváldiide.

Dáiddadáhpáhusa válmmaštallin sámedikkis bargá Anni Näkkäläjärvi (anni.nakkalajarvi(at)samediggi.fi). Dárkilut rávvagat ja dáhpáhusa njuolggadusat doaimmahuvvojit skuvllaide buori áiggis ovdal dáhpáhusa. Čuovo maid sámedikki ruovttusiidduid www.samediggi.fi .