Sámedikki ásahan oktasašbargoorgána čoahkkánii dán válgabaji vuosttaš čoahkkimii Anárii miessemánu 27. beaivve. Ovttasbargoorgánas leat mielde ovddasteaddjit oahpahusministeriijas, oahpahusráđđehusas, Lappi leanaráđđehusas, sámiid ruovttuguovllu gielddain ja sámedikkis. Oktasašbargoorgána ulbmilin lea ovddidit oahpahusa sámegielas ja sámegillii buoridemiin ovttasbarggu, dieđuid juohkima ja gulahallama daid orgánaid gaskkas, mat barget sámeoahpahusa áššiiguin.

Oahpahusráđđi Leena Nissilä oahpahusráđđehusas buvttii oahpahusráđđehusa dearvvuođaid čoahkkimii ja muitalii ee. cuoŋománus ásahuvvon diibmojuohkobargojoavkku barggus. Oahpahusministeriija lea addán bargojovkui áiggi geasi 2010 rádjái. Dan maŋŋá galgá álggahuvvot riikka dási oahppaplána vuođustusaid ođasmahttin. Ovddit oahppaplánaođastus gárvánii jagi 2004.

Sámi skuvlenáššiid oktasašbargoorgána čoahkkána čuovvovaš gearddi čakčat. Dalle galget áššelisttus leahkit sámegielat oahppamateriáladilit ja dárbbut, sámegielat oahpaheaddjiid skuvlen, oahppaplána vuođustusaid ođasmahttin ja guovlohálddahusa ođasmahttin. Mearriduvvui maid, ahte ovttašbargui bovdejuvvojit mielde Lappi ja Oulu universiteahtat.