Vuoigatvuohtaministeriija lea lahkonan sámedikki reivviin, mii guoská almmolaš čovdosa áigái oažžumii, man dárkkuhussan lea buoridit sápmelaččaid riektesasjádaga iešguđet hálddahussurggiin ja láhkaásaheamis. Sámedikki stivra lea almmuhan ministeriijai iežas duhtameahttunvuođa das, ahte ILO 169-soahpámuša ratifiseren ii leat máinnašuvvon stáhta vuoruhuvvon ulbmilin.

Stivra lea maid iežas vástádusas ministeriijai imaštallan álgoálbmotvuoigatvuođaid ovddideami ádjáneami ja bivdán stáhtaráđis oktasaščoahkkima sámedikki stivrrain, oaiveministtariin ja dán ášši čoavddaministtariiguin. Ságadoalli Juvvá Lemet, Klemetti Näkkäläjärvi, muitalii sámedikki 24.6. čoahkkánan dievasčoahkkimii áigeguovdilis áššiin. Son gávnnahii, ahte Vanhasa nuppi ráđđehusa doaibmaáigodat lea juo mannan beallemutto meaddel, iige ráđđehus leat ovddidan álgoálbmotvuoigatvuođaid nugo ráđđehusprográmmii lea čállojuvvon.

Álgoálbmotáššit ovdánit birashálddahusas

Birasministeriija lea ásahan geassemánu álggus álgoálbmogiid árbedieđu gieđahalli áššedovdibargojoavkku. Dan bargun lea suokkardit biodiversiteahttasoahpamuššii gullevaš artihkkala, mii guoská álgoálbmoga árbedieđu heiveheami. Sámedikki ságadoalli almmuhii duhtávažžan, ahte sámedikkis lea buorre ovddastus bargojoavkkus. Son ieš bargá bargojoavkku ságadoallin. Sámedikki ovddasteaddjin bargojoavkkus leaba maid ohcejohkalaš doavttir, sámedikki áirras Heidi Eriksen ja boazoisit J. Antti Magga Eanodagas.