Anáris 21.-22.8.09 guđat geardde lágiduvvon eamiálbmogiid musihkkadáhpáhus Ijahis idja buktá olbmuide geahččanláhkai ja guldalanláhkai sámekultuvrra máŋggaid suoivvaid. Ijahis ija konsertii nohkki musihkkadáhpáhusa prográmma addá buot ahkásaš olbmuide vejolašvuođa vásihit máŋggalágan áššiid: dahkat, oaidnit ja gullat olus nu mot oassálastit bargobájiide, gullat miellagiddevaš ságastallamiid musihkkasemináras ja searvat nuoraid konsertii.

Ijahis ija váldodáhpáhusas, lávvardat eahkeda Ijahis ija konsearttas, leat máŋggalágan artisttat. Gullamis leat sihke čeahppit geat hálddašit árbevirolaš sámemusihkka (luođi, livđe ja leu`dda) ja joavkkut geat čuojahit sámegielat populáramusihkka. Earenomaš ilus lágideaddjit leat dán jagi das, go konsearttas leat mielde báikegotteolbmot geain lea máhttu árbevirolaš musihkkašlájaid hárrái. Suoma beal Sámi lassin festiválai servet joavkkut maiddái Ruoŧas ja Ruoššas.

Rock-joavku Mollet lea okta Ijahis ija konseartta násttiin. Joavku čuojaha sámegielat rock-musihkka lotkes vugiin ja sin showa lávdde alde leage oaidnin veará! Mollet lea johttán sámefestiválain miehttá Norgga ja Ruoŧa, ja dál sii leat vuosttas geardde čuojaheamen Anáris. Suoma bealde Ijahis ija konsertii bohtet ee. Ulla Pirttijärvi joavkkuinis, Somby ja Niillas Holmberg & Roope Mäenpää. Ulla Pirttijärvis lea ođđa joavku, geainna son lea vuosttas geardde ovttas Ijahis ija lávddi alde. Pirttijärvi ovdánbuktá guldaleaddjiide luđiid luonddu birra. Ulla musihkkarat mieđuštit ja ráhkadit luđiid jietnamáilmmi ákusttalaš instrumenttaid iešvuođaid bokte, eai nuge musihkka bokte.

Dán jahkásaš eamiálbmotguossin lea Aurora Borealis – joavku Davviálbmogiid instituhttas Pietaris. Joavku ovddasta máŋggaid Sibiriija eamiálbmogiid. Mielde leat omd. evenat, nenetsat ja jakutat. Aurora Borealis-joavkku prográmma ráhkkasa Davvi-Sibiriija eamiálbmogiid dánssain, instrumeantala- ja vokálamusihkkas ja rituálain mat laktasit earálágan seremoniijaide.

Jo árbevierrun šaddan musihkkaseminára áigge gieđahallojuvvo temá “Sámiid ja eará eamioálbmogiid árbevirolaš musihkka globalisašuvnna deattu vuolde”. Hálliin leat Matti Morottaja “Anáraš musihkka”, Annukka Hirvasvuopio-Laiti “Sápmelaš musihkkasohkabuolvvat”, Igor Nabuk “Ruošša eamiálbmogiid musihkka” ja Marko Jouste fáttáin “Mo máhcahit láhppon árbevieru?”. Fáttá “makkár mearkkašupmi sámemusihkkas ja sámegielat musihkkas lea nuorra sápmelaččaid identitehtii. Goas juiget, goas lávlot, manin lávlot, manin juiget?” fas čiekŋudit sámenuorat jurddahallat. Nuoraid sáhkavuoruin leat mielde omd. Niillas Holmberg, Milla Pulska ja Nils-Heikki Paltto. Musihkkasemináras gullat maiddái live-musihkka. Dilálašvuohta lágiduvvo sámemusea Siidda auditorias ja dat lea buohkáide rabas.

Mánáid ja nuoraid beaivi bearjadaga 21.8 sisttisdoallá musihkkabárgobájiid skuvllamánáide ja nuoraid konseartta. Oahpaheaddjiin musihkkabargobájiin leat omd. Annukka Hirvasvuopio-Laiti ja Aurora Borealis-joavkku lahttut. Nuoraid konsearttas lávddi ala besset sámenuorat joavkkuinis. Sii čuojahit máŋggalágan musihkka, juiget ja sis leat maiddái teáhterčájáhusat. Beaivvi dáhpáhussii servet sámenuorat ja –mánát miehttá Sámi.

www.ijahisidja.fi

Lassedieđut: Anna Näkkäläjärvi tlf. +358 40 840 0383, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.

Lágideaddjit: Anára Sámisearvi ro, Sámediggi, Sámi oahpahusguovddaš SOGSAKK, SIIDA/sámemusea, Anára gielda