Guđat geardde lágiduvvon eamiálbmogiid musihkadáhpáhus Ijahis Idja Anáris lei stuorra menestus. Ijahis Idja-dáhpáhusa váldokonsearta olahii eanet olbmuid go goassege ovdal. Bileahtaid konsertii vuvde badjel 500, mii lea guokte geardde eanet go maŋimus jagiid. Dán jagi dáhpáhusa áigemeari sirde miessemánus borgemánnui ja das lei positiivvalaš váikkuhus gussiid lohkui. Dan lassin guossit návddašedje dáhpáhusas čáppa dálkis.

Ijahis Idja –dáhpáhusa váldokonseartas 22.08 lávddi nalde ledje artistat miehtá Sámi. Gussiid guoimmuhedje earret eará Mollet, Somby ja Ulla Pirttijärvi ođđa joavkkuin. Konseartabáiki dievai movttegis festiválagussiin geat ledje boahtán viidat iešguđet guovlluin Sámis. Ijahis Idja lea šaddan dehálaš deaivvadanbáikin. Okta eahkeda artistain, Niillas Holmberg logaige maŋŋel konsearta: ”Dat mii lea musihkas deháleamoš lea ahte dat buktá olbmuid oktii”. Maiddái turistat gávdne festivála.

Bearjadaga 21.8 mánáid- ja nuoraid dáhpáhussii serve máŋga Sámeguovllu skuvlla. Anárii bohte oahppit Vuohččus, Njuorggámis, Garegasnjárggas ja Avvilis. Oktan Anára márkana ohppiiguin beaivvi bargobájiide oassálaste oktiibuot 100 máná ja nuora. Bargobájiid jođihedje Annukka Hirvasvuopio-Laiti (musihkka), Kerttu Vuolab (čállin), Aurora Borealis –dánsajoavkku Davviálbmogiid instituhtas Pietaris (dánsun). Ijahis Idja –dáhpáhusa nuoraidkonseartas návddašedje davvi nuoraid iežas joavkkuid ovdanbuktimis.

Ain lea Ijahis Idja!

Lassedieđut: Anna Näkkäläjärvi, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. , +358408400383