Dasa lassin konfereanssas ságastallet sámenuoraid deaivan hástalusain ja vejolašvuođain sámeservodagas ja dálá Suomas. Konfereanssa áigge gullatge sáhkavuoruid, mat bohciidit jurdagiid. Konfereanssa temán lea Nuorat! Gii din áššiin mearrida? Dárkkuhussan lea duvdit sámenuoraid oassálastit sin iežaset guoski áššiid ovddideapmái. Konfereansa lágiduvvo guovtti beaivve áigge.

Bearjadaga golggotmánu 16. beaivvi konfereansa lea buohkaide rabas ja nuvttá. Dilálašvuohta lea dárkkuhuvvon sámenuoraide, mearrádusdahkkiide, Sámedikki lahtuide, virgeoapmahaččaide, servviid ovddasteaddjiide, dutkiide ja buohkaide daidda, geat leat beroštuvvan áššis. Dilálašvuođas gullat sáhkavuoruid sierra geahččanguovlluin.

Konfereanssa nubbi beaivi lea dárkkuhuvvon sámenuoraide. Lávvardaga golggotmánu 17. beaivvi konferensii sáhttet oassálastit 20 vuosttažettiin iežaset almmuhan sámenuora. Oassálastit galget leat 18-29 -jahkásaččat. Oassálastiid sávvat boahtit miehtá Suoma ja goasttidit sidjiide idjademiid ja borramuša. Nuorat oassálastet bearjadaga golggotmánu 16. beaivvi buohkaide rabas dilálašvuhtii ja lávvardaga 17. beaivvi bargobájiide.

Konfereansa lea oassi Sámedikki Nuoraidlávdegoddi-prošeavtta, man ulbmilin lea buoridit sámenuoraid oassálastin- ja váikkuhanvejolašvuođaid. Váikkuhanvejolašvuođaid lasihemiin dorjojuvvo nuoraid eaktodáhtolaš doaibman ja nannejuvvo nuoraid oassálastin sámiid iešhálddašeami ollašuhttimis. Prošeavtta ulbmilin lea ásahit Sámedikki vuollai nuoraidlávdegotti ja nuoraidáššiidčálli. Dáin doaibmabijuin geahččalit láhčit sámenuoraide vejolašvuođa váikkuhit ja oassálastit mearrádusaid dahkamii sihke nannet sin sápmelaš kulturduogáža ja identitehta.

Prošeavtta ollašuhttima pláne Sámedikki nammadan bargojoavku, masa gullet guhtta nuora. Dasa lassin bargojoavkku doaibmamis lea fárus oahpahusministeriija nammadan áššedovdilahttu. Prošeavttas lea maiddái prošeaktabargi. Bargojoavku válmmaštallá Sámediggái evttohusa nuoraidlávdegotti ráhkadusas, válljemis ja doaibmama sisdoalus. Nuoraidlávdegotti vuođđudeapmi nanne sámenuoraid vejolašvuođaid váikkuhit sin iežaset guoski áššiide ja dan bokte vuoigatvuođaid ovddideapmái, maiguin suodjalit ja ovddidit sin iežaset kulturárbbi.

Lassedieđut ja almmuhanrávvagat dáppe.

Lassedieđuid: Prošeaktabargi Anne Länsman, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. tel. 010 83 93 134