Sámi kulturguovddáža ovdanbuktin

Sámi kulturguovddážii, mii huksejuvvo Anára kirkosiidii Juvdujoga gáddái, bohtet doaibmalanjat Sámediggái, sámekultuvrai gulavaš máŋggabealat doaimmaide ja maiddái sámi oahpahus- ja dutkandoibmii. Dáid lassin vistti dehalaš doaibmasajit leat oktasašlanjat: loaiddastan-, čoahkkin- ja máŋggadoaibmalanjat ja restauráŋŋa, mat leat sajuštuvvan máŋggadoaimma- ja bálvalusfeaskára birra. Oktasašlanjaid geavaheapmi lea kulturguovddáža buot doaimmaid dehalaš oassi.

Sámi kulturguovddáža dárkkuhussan lea láhčit sámiide buoret dilálašvuođaid iežas eavttuiguin doalahit ja ovddidit giela, kultuvrra ja ealáhusdoaimma, dikšut ja ovddidit kulturiešráđđema ja maiddái duvdit sámiid almmolaš eallineavttuid ovdáneami.. Lassin guovddáža dárkkuhussan lea buoridit vejolašvuođaid juohkit ja oažžut dieđuid sámiin eamiálbmogin.

Sámi kulturguovddáš lea ovdasajis dárkkuhuvvon sámiid iežaset geavaheami várás.  Das lea oaivil boahtit Suoma sámiid iešráđđema ja maiddái ealli ja ovdáneaddji sámekultuvrra symbolan, man guovddáš doaibman lea sihke gáhttet árbevirolaš kultuvrra ja maiddái ovddidit ja ođasmahttit sámi servodateallima.

Čilgejuvvon váldodárkkuhusa lassin kulturguovddáš fállá viiddis, ođđaáigásaš ja alladássásaš oktasašgeavahanlanjaid (čoahkkin-, auditorio-, máŋggadoaibma- ja loaiddastansajiid ja studiolanjaid) dihte erenomáš vejolašvuođaid lágidit áidnalunddot birrasis máŋggalágan čoahkkimiid, konfereanssaid ja dáhpáhusaid.

Sámi kulturguovddáš lea dasto seamma áigge nu Suoma sámiid parlameantadállu go kultur-, skuvlen- ja máhttinguovddáš ja maiddái dáhpáhusdállu iešguđetlágan čoahkkimiiguin, musihkka-, filbma- ja teáhterloaiddastemiiguin. Nuppiide laktásan oassedoaimmat dorjot nuppiideaset sisdoaluid ja lanjadagaid beales.

Sámi kulturguovddáža hukseha ja oamasta Senaatti-giddodagat ja dan bruttoviidodat lea sullii 4 800 m².  Huksenfidnu goasttádusárvu lea sullii 12 miljovnna euro, mas EU-ruhtadeami oassi lea 5 miljovnna euro. Sámi kulturguovddáža huksen álgá giđđat 2010 ja dat galggašii gárvánit jagi 2012 álggu rádjai.

Sámi kulturguovddáža váldoláigolažžan doaibmá Sámediggi, mii láigoha lanjaid eará geavaheaddjiide. Sámi oahpahusguovddáš lea Sámedikki lassin dálu nubbi váldogeavaheaddji. Dálu eará geavaheaddjit leat Anára gieldda girjerádjodoaibma, Sámi Duodji rs (sámeduojáriid searvi), SámiSoster rs (sámiid sosiála- ja dearvvasvuođasuorggi searvi), Lappi leanaráđđehus ja Sámeárkiiva ja restauráŋŋa, mat vuođđuduvvojit.

Nammagilvvu njuolggadusat:

1. Gilvvu dárkkuhussan lea gávdnat Sámi kulturguovddážii, mii huksejuvvo Anára kirkosiidii, dan dárkkuhusa ja doaimma govvideaddji nama.

2. Gilvvu lágideaddjin doaibmá Sámediggi.

3. Gilvu lea rabas buohkaide.

4. Gilvoáigi álgá 18.1.2010 ja nohká 17.3.2010 dmu 16, man rádjai gilvoevttohusat galget joavdat dáid njuolggadusaid 5. čuoggás namuhuvvon čujuhussii. Mearreáigge maŋŋá boahtán evttohusat eai váldojuvvo vuhtii.

5. Gilvui oassálasto jogo nu ahte poastta fáro sáddejuvvojit nammaevttohus ja oassálasti oktavuohtadieđut čujuhussii Saamelaiskäräjät, Angelintie 696, 99870 Inari dahje buktimiin nammaevttohusa ieš dahje aššeolbmo bokte ovdalis namahuvvon čujuhussii. Nammaevttohusa sisttisdoalli giddejuvvon konfeluhttii merkejuvvo dovddaldat "Nammagilvu". Bealehisvuođa sihkkarastima dihte oassálasti oktavuohtadieđut, nappo namma, čujuhus, telefonnummir ja šleađgapoastačujuhus laktojit evttohussii sierra, giddejuvvon konfeluhtas. Eará láhkai doaimmahuvvon evttohusat hilgojuvvojit.

6. Persovdnadieđut gieđahallojit dušše nammagilvvu oktavuođas, eaige dat luohpaduvvo viidásabbot. Nammaevttohusa sádden olbmuid buot persovdnadieđut duššaduvvojit gilvvu nogadettiin.

7. Gilvui sáhttá oassálastit eanet go ovttain evttohusain ja daid sáhttá sáddet seamma konfeluhtas.

8. Nammaevttohus galgá leat sámegielat, millosepmosit davvisáme-, anáraš- dahje nuortalašgielat.  Evttohusa sáhttá vuođustallat maiddái suomagillii.

9. Nammii biddjon gáibádusat

a.   Nammagilvvuin ohcco Sámi kulturguovddážii oanehis, deaivilis, milliibáhcci ja čalmmus sámegielat namma, mii govvida kulturguovddáža

- kultuvrralaš duogáža ja mearkkašumi,

- sámi iešlági,

- viiddis ja máŋggabealat doaimma ja dan

- arkitektuvrralaš hápmegiela.

Namma ii oaččo leat anus juo seammasullasaš sámevisttis.

b.   Evttohusain galgá váldit vuhtii nama čállinhámi ja dadjama. Nama galgá sáhttit álkket sierra gielain dadjat ja njuovžilit sojahit. Sávvo, ahte dat heive maiddái riikkaidgaskasaš ja elektrihkalaš geavaheapmái.

c.   Nammaevttohusaid galgá vuođustallat.

10. Bálkkašanlávdegoddi

a) Gilvvu čoavdá 10-lahttosaš bálkkašanlávdegoddi, masa gullet okta ovddasteaddji kulturguovddáža juohke geavaheaddjiorganisašuvnnas (oktiibuot 8 ovddasteaddji) ja maiddái ovddasteaddji Senaatti-giddodagain ja kulturguovddáža arkitektuvragilvvu vuoitán plánejeaddjijoavkkus.

b) Bálkkašanlávdegottis lea ságajođiheaddji ja várreságajođiheaddji ja maiddái  čálli ja veahkkebargi.

c) Lávdegotti veahkkin doaibmá 4-lahttosaš bargolávdegoddi.  Lávdegoddi ja dan  bargolávdegoddi sáhttet dárbbu mielde geavahit barggus áššedovdiid.

11. Gilvoevttohusat árvvoštallojit namaheapmen. Vuoitin válljejuvvo buoremusat nammii ásahuvvon gáibádusaid deavdi evttohus.  Gilvvu lágideaddjis lea goittotge nu hálidettiin vuoigatvuohta leat válljekeahttá vuoitin mange evttohusa.

12. Bálkkašumit

a)Vuoitievttohusa bargi bálkkašuvvo 1 000 euroin.

b)Jos máŋga oassálasti leat evttohan seamma nama, bálkkašupmi juhkko sin gaskkas.

13. Gilvvu lágideaddji oažžu buot vuoigatvuođaid vuoitán evttohussii. Lágideaddjis lea maiddái vuoigatvuohta nuppástuhttit dahje leat geavatkeahttá nama.

14. Gilvvu guoski vejolaš jearaldagaide vástida Sámi kulturguovddášfidnu prošeaktahoavda Juha Guttorm, tel. 0400-142 518 ja šleađgapoasta Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. .

15. Gilvvu guoski almmuhus olggosaddo čuovvovaš aviissain: Ávvir, Lapin Kansa, Enontekiön Sanomat, Inarilainen ja Sompio. Lassin dan sáhttá lohkat Sámedikki ruoktosiidduin http://www.samediggi.fi/.

Mildosat:  Sámi kulturguovddáža arkitektuvragilvvu prográmma ja gilvvu árvvoštallanbeavdegirji ja maiddái maŋimuš hámusgovat ja - tevnnegat arkitektuvragilvvu vuoitán ađa -nammasaš evttohusas. Mildosiidda sáhttá oahpásmuvvat Sámedikki ruoktosiidduin dahje Sámedikki guovddášdoaimmahagas Anára Rivdolas, čujuhus Angelintie 696.

Vuosttas nammagilvui boahtán dohkkehuvvon evttohusat