Dáiddadáhpáhus háliiduvvui lágiduvvot Roavvenjárggas, go gávpogis ásset mearkkašahtti olu sámenuorat, geat eai ovdal leat oassálastán dáiddadáhpáhussii ja dušše muhtimat leat ožžon sámegiela oahpahusa skuvllas. Sámenuoraid dáiddadáhpáhusat leat lágiduvvon 1970-logu rájes.

Váldolágideaddji sámediggi hálida, ahte dáiddadáhpáhus lea nu máŋggaid sámenuoraid olánmuttos go vejolaš. Dáhpáhusa oktan dárkkuhussan lea maiddái movttiidahttit sámegiela lohkamii. Dáiddadáhpáhus doarju nu nuoraid dáiddalaš áiggeájiid go sámegiela geavaheami. Máŋggat beakkán sámedáiddarat leat ožžon vuosttas loaiddastanvásáhusaid justa dán dáhpáhusas. Dáhpáhus lea áidna juohkejahkásaš sámegielat nuoraiddáhpáhus Suomas.

Temán musihkka

Sámenuoraid dáiddadáhpáhusa temán lea dán jagi musihkka sierra šlájaiguin. Dáhpáhussii leat almmuhan 22 musihka loaiddasteaddji dahje joavkku, main leat oktiibuot 150 gilvui oassálasti. Loaiddasteamit ovddastit davvisáme-, anáraš- ja nuortalašgielaid. Nuorat bohtet dáhpáhussii measta buot sámeguovllu skuvllain. Roavvenjárggas fárrui leat almmuhan golbma joavkku/loaiddasteaddji. Dáhpáhussii lágiduvvojit linnjabiila sáhtut birra sámeguovllu.

Dáhpáhus álgá gaskavahku cuoŋománu 7. beaivve Nivavaara vuolledási skuvllas dmu 18.30 Giron sámeteáhtera čájáhusain Ovtta guovvamánoija (Yhtenä helmikuun yönä). Eahket joatkašuvvá nuoraidbáiki Mondes dmu 20.00 lágiduvvon konserttain, gos sámegillii rokkaa SomBy. SomBy lea beakkán Suoma lassin Norggas ja Ruoŧas. Diimmá čavčča dat buvttii eurohpalaš vehádatjoavkkuid lávlungilvvus Liet internationaalis vuoittu Sápmái. SomBy álggaha Roavvenjárgga dáhpáhusas debyyttialbumi Álas eana (alaston maa) almmustahttinturnea.

Dáhpáhusa áigge sáhttá maiddái oahpásmuvvat sámemusihkkii, girjjálašvuhtii ja dujiide. Sámi Duodji ry - duodjesearvi oassálastá dáhpáhussii doppe čájehemiin ja vuovdimiin buktagiid.

Sámenuoraid dáiddadáhpáhus gullá riikkaviidosaš Nuorra Kultuvra dáhpáhussii, mii ii lágiduvvo dán jagi. Oahpahusministeriija ruhtada goittotge sámenuoraid dáiddadáhpáhusa maiddái dán giđa. Dáhpáhusa lágidit sámediggi, sámi mánáidkulturguovddáš, Roavvenjárgga gávpot ja Roavvejárgga sámesearvi Mii ry.

Lobis lea suohtas ja ivdnás sámenuoraid ávvudeapmi, go sámegávttat sámenuorat almmustuvvet Roavvenjárgga gáhttagovvii ! Buot dáhpáhusaide lea friija sisabeassan.

Lassidieđut:

Kaisa Tapiola

kaisa.tapiola(at)samediggi.fi

tel. 010 839 3132, 050 435 0177

www.samediggi.fi

http://www.samiteahter.org/

www.tuuparecords.fi

http://www.myspace.com/sombyfinland http://www.rovaniemi.fi/suomeksi/Palveluhakemisto/Nuoret/Nuorisotilat.iw3