Govain Ruoŧa sámedikki stivrra ságadoalli Sara Larsson, Norgga sámedikki várreságadoalli Laila Susanne Vars ja Suoma sámedikki ságadoalli Klemetti Näkkäläjärvi. Govat: Sára Márjá Magga.

 – Lea illu addit jođiheami Supmii dilis, mas sámeáššit leat šaddamen earenoamáš álbmogiidgaskasaš geahčastaga čuozahahkan Ovttastuvvon Nášuvnnain (ON), gávnnahii Ruoŧa sámedikki ságadoalli Sara Larsson parlamentáralaš ráđi čoahkkimis Roavvenjárggas 14.4.

Sámi parlamentáralaš ráđđi lea vuođđuduvvon 2000-luvun álggus ja dat doaibmá Davviriikkaid sámedikkiid ovttasbargoorgánan. Maiddái Ruošša sámit oassálastet ráđi bargui. Parlamentáralaš ráđđi čoahkkána Roavvenjárggas ja oažžu guossin ON eamiálbmotvuoigatvuođaid earenoamašraporterejeaddji James Anaya. Earenoamášraporterejeaddji lea dál vuosttaš geardde olmmošvuoigatvuođaid historjjás ráhkadeamen olmmošvuoigatvuohtaraportta álbmogis, mii orru njealji riikka guovllus. Olmmošvuoigatvuohtaraporttat leamaš ovdal ovtta stáhtas ja dan olmmošvuoigatvuohtadiliin ain hávil.

Earenoamášraporterejeaddji galledeami olis Roavvenjárggas ordnejuvvo gaskavahku 15.4. konferánsa, mii gieđahallá sámiid olmmošvuoigatvuođaid ja iešmearrideami ollašuvvama. Davviriikkaid sámedikkit raporterejit sámiid diliin iežaset ruoktoriikkain. Stáhtaid ráđđehusaid ovddasteaddjit leat konferánssas mielde ovdanbuktimen stáhtaid oainnuid ja vástideamen sámedikkiid ovdanbuktin gážaldagaide ja ságastallamiidda.

Bearjadaga 16.4. beassá maid sámi sivilaservodat, sámi searvvit ja organisašuvnnat ovdanbuktit iežaset oainnuid earenoamášraporterejeaddjái. Álbmogiidgaskasaš konferánssa temán Roavvenjárggas leat sámiid iešmearrideapmi álgoálbmogin, vuoigatvuohta eatnamiidda, čáziide ja luondduriggodagaide, mánát ja nuorat earenoamážit giela ja oahpahusa olis ja vel lassin olmmošvuoigatvuohtakonvenšuvnnaid goziheapmi ja mearreáigerapoteren iešguđet riikkas.