Stáhtat ja sámedikkit gárvásat sámesoahpamušráđđádallamiidda |
![]() |
![]() |
- Áigi lea láddan davviriikkalaš sámesoahpamuša guoski ráđđádallamiid álggaheapmái. Davviriikkaid sámedikkiid ságadoallit ja stáhtaid sámeáššiin vástideaddji ministtarat čoahkkanit Oslos miessemánu 25. beaivve soahpan dihtii ráđđádallamiid áigetávvalis ja meannudanvugiin.
Govain Suoma sámedikki lahtut Tuomas Aslak Juuso ja Asko Länsman ja várreságadoalli Erkki Lumisalmi. Govat: Sára Márjá Magga.
– Sáhttit illudit das, ahte sámesoahpamuša guoski ráđđádallamat álget ja ášši ovdana, gávnnahii Norgga sámedikki várrepresideanta Laila Susanne Vars sámi parlamentáralaš ráđi čoahkkimis Roavvenjárggas 14.4.
Sámi parlamentáralaš ráđi čoahkkin dohkkehii julggaštusa davviriikkalaš sámesoahpamuša ovddideamis ráđđádallamiid álggahettiin. Evttohus Suoma, Ruoŧa ja Norgga oktasaš davviriikkalaš sámesoahpamuššan gárvánii áššedovdebargojoavkkus jagis 2005. Bargojoavkkus ledje ovddasteaddjit sihke ráđđehusain ja sámedikkiin. Parlamentáralaš ráđđi bivdá dál, ahte ráđđádallamiidda ásahuvvošii bistevaš ja dohkálaš áigeplána.
Parlamentáralaš ráđđi deattuha julggaštusasttis dan, ahte davviriikkalaš sámesoahpamuš boahtá leat eahpedievaslaš nu guhká go Ruošša sámit leat soahpamuša olggobealde. Parlamentáralaš ráđđi doarju Ruošša sámiid figgamušaid iežaset álbmotválljen orgána vuođđudeamis ja ávžžuha maid Suoma, Ruoŧa ja Norgga ráđđehusaid doarjut Ruošša sámiid ulbmiliid.
Davviriikkalaš sámesoahpamuša ulbmilin lea ee. dahkat oktilažžan sámiid riektesajádaga ruoktoriikkaineaset ja nannet sámiid vejolašvuođaid bargat riikkaid rájáid rastá ja bissut oktan álbmogin. |
|
Viimeksi päivitetty ( 18.04.2010 ) |