Sámiide lea dorvvastuvvon Suoma vuođđolágas álgoálbmoga sajádat, vuoigatvuohta iežaset gillii ja kultuvrii ja kulturiešráđđen ruovttuguovllusteaset. Sámegiella lea suodjaluvvon sámi giellalágain ja sámedikki bargguin lea mearriduvvon iežas lágain. – Sámiid iešmearridanvuoigatvuohta álbmogin ii goittotge ollašuva daningo sámiid iešráđđen lea ráddjejuvvon guoskat dušše giela ja kultuvrra, gávnnahii Sámedikki ságadoalli Klemetti Näkkäläjärvi, Juvvá Lemet, Roavvenjárggas 15.4. ordnejuvvon konferánssas.

Suopma ii leat ratifieren iešmearridanvuoigatvuođa nannejeaddji soahpamušaid nugo ILO 169-soahpamuša, iige ollašuhttan ON dievasčoahkkimis 2007 dohkkehuvvon álgoálbmogiid vuoigatvuođaid julggaštusa iige Unesco inmateriála kulturárbbi suodjalansoahpamuša. – Suopma ii maiddái leat lihkkostuvvan dievaslaččat deavdit jo ovdal ratifierejuvvon soahpamušaid geatnegasvuođaid sámiid vuostá, gávnnahii Näkkäläjärvi.

Näkkäläjärvi gávnnahii vel ságastis, man doalai ON earenoamáš raporterejeaddji olmmošvuoigatvuohtaraporterema oktavuođas ordnejuvvon konferánssas, ahte váttisvuohtan lea maid dat, ahte Suopma ii dovddas sámiid álbmogin baicce álgoálbmogin. – Suopma ii dohkket sámiid álbmogin ja rihkku dás diđolaččat ON sivila- ja politihkalaš vuoigatvuođaid guoski álbmogiidgaskasaš almmolašsoahpamusa vuosttaš artihkkala, dajai Näkkäläjärvi. – Lea váidalahtti, ahte Suoma stáhta ain joatká nátionalisttalaš politihka árbbi, mas jurddan lea okta álbmot ovtta riikkas.

Näkkäläjärvi anii sámiid iešráđđema resursavátnivuođa struktuvrralaš vealáheapmin ja easttan iešráđđema ollašuvvamii. – Sámedikki resursavátnivuohta eastá beaktilit sámedikki barggu, man ulbmilin lea sámiid sajádaga ja maiddái iešmearridanvuoigatvuođa ovddideapmi. – Sámedikki váldobargovuogit leat ráđđádallamat, cealkámušat ja álgagat. Sámiid dáláš iešmearridanvuoigatvuohta lea ráddjejuvvon oktasaš oainnu ovdan buktimii ja ovttasbargui sámedikki bokte, dajai Näkkäläjärvi.

Govas Norgga sámedikki várreságadoalli Laila Susanne Vars, Suoma Sámedikki ságadoalli Klemetti Näkkäläjärvi ja ON álgoálbmotvuoigatvuođaid earenoamášraporterejeaddji, professor James Anaya. Govva: Sára Márjá Magga.

Loga Klemetti Näkkäläjärvi olles sága Saami People´s right to self-determination in Finland K Näkkäläjärvi 150410.