– Konsearta lea Adjágasa vuosttas Suomas. Ijahis idja -festiválaorganisášuvdna lea ilus, go oažžu vuostáiváldit ná dehálaš sámejoavkku dáhpáhussii ja ahte sin musihka beassat gullat viimmat Suoma Sámis, festiválahoavda Anna Näkkäläjärvi rámiida.

Adjágas laktá musihkas davvisápmelaš juigosa ja modearna musihka šuoŋaid. Joavkku maŋimuš albuma lea Mánu rávdnji (2009), man ovdal almmustuvai debyhtaskearru Adjágas (2006). Adjágas loaiddastii Vancouver olympiagilvvuid kulturprográmmas ja lea erenomáš bivnnut joavku nu ruovttueatnamis Norggas go riikkaidgaskasaččatge.

Jagi 2010 temán lea oktiigullevašvuohta

Čihččet geardde lágiduvvon Ijahis idja čuodjá Anára kirkosiiddas 20.–22.8.2010. Festivála lea stáđásmahttán iežas sajádaga sámemusihka ovdanbukti dehaleamos dáhpáhussan Suomas. Festivála temán lea dán jagi eamiálbmogiid oktiigullevašvuohta. Eamiálbmogat bohtet Anárii golmma sierra nannámis ja kultuvrraid deaivvadeapmi lea áidnalunddot festivála historjjás.

Ijahis ija váldodáhpáhus lea lávvardaga 23.8. lágiduvvon Ijahis ija -konsearta, gos gullat Adjágasa musihka lassin eamiálbmotgussiid loaiddastemiid, árbevirolaš sámi vokálamusihkkašlájaid loaiddasteaddjiid ja maiddái sámi räp Amocis ja Ailu Valles ja olu eará sámemusihka.

Ijahis idja - dáhpáhusa lágidit ovttasbarggus Anára Sámisearvi rs, Sámediggi, Sámi oahpahusguovddáš, Sámemusea Siida, Anára gielda, Giellagas-instituhtta ja Anára searvegoddi.

Oappážan, vieljažan!

Lassidieđut vs. kultučálli Anna Näkkäläjärvis, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. , 0408400383 ja dáhpáhusa neahttasiidduin čujuhusas http://www.ijahisidja.fi/.