SÁMEMUSIHKKAGUOVDDÁŠ 

Sámemusihkkaguovddáš lea dehálaš sajis ođđa sámekulturguovddážis Sajosis. Sámemusihkkaguovddáš koordinere ja organisere sámemusihka oahpahusa skuvllaide ja ovddida sámemusihka oahppoplánaid. Sámemusihkkaguovddáš bargá ovttas ee. Sámi oahpahusguovddážiin. Sámemusihkkaguovddáža idean lea maid ovddidit ođđa kulturfitnodatdoaimma ee. fállamiin vejolašvuođaid sámemusihka báddemii ja vurkemii, fállat sápmelaš artisttaide loaiddastanvejolašvuođaid, dahkat sámemusihka dovddusin ja seailluhit ja ain ovddidit árbevirolaš musihka sirdimiin dan maŋit buolvvaide.

Oktavuohtaolmmoš:  Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.

EAMIÁLBMOGIID FILBMAGUOVDDÁŠ

Eamiálbmogiid filbmaguovddáš Skápma dárkkuhussan lea doarjut sámegiela, kultuvrra ja addit sápmelaččaid ja eará eamiálbmogiid iežaset jiena ja gova oidnot ja gullot eará guovlluin máilmmi. Doaimma ulbmilin lea loktet sáme- ja eamiálbmogiid iežaset filbma- ja televisiobuvttadeami dakkár dássái, ahte dat bastá fállat barggu ja birgenlági guovllu nuoraide. Guovddáža barggut leat sápmelaččaid filbma, tv- ja mediafitnodagaid doarjun, sámefilmmaid ja tv-prográmmaid buvttadeapmi, skuvlejumi plánen, sámefilmmaid vuovdaleapmi, guovllu vuovdaleapmi, eamiálbmogiid filbmaarkiivan ja diehtobáŋkun leahkin ja Skábmagovat-filbmafestivála ordnen.

Oktavuohtaolmmoš:  Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.

SÁMI MÁNÁIDKULTURGUOVDDÁŠ

Sámi mánáidkulturguovddáža(MKG) ulbmilin lea ráhkadit ja nannet ovttaskas olbmo ja servoša máhtu vuoiŋŋalaš oami ja buresbirgejumi, dáiddalaš doaimma ja kulturárbbi bajásdoallamii ja lasiheapmái. Mánáidkulturguovddáš doaibmá ovttas eará hálddahusgielddaiguin, kulturásahusaiguin, skuvlen- ja dutkanovttadagaiguin sihke goalmmát sektorain.

MKG fuolaha mánáidkultuvrra guoski dieđiheamis, ovttasbarggus eará organisašuvnnaid gaskkas, guovllu, riikkaviidosaš ja riikkaidgaskasaš ovttasbarggus ja mánáidkultuvrra fidnudeamis. Lassin doaimma ulbmilin lea ovddidit sápmelaš mánáidkultuvrra báikkálaččat ja guovlluguovdasaččat ja dorvvastit sápmelaččaide ovttaveardásaš vejolašvuođaid máŋggabealat kulturbálvalusaide ja -vásáhusaide. MKG dárbbaša kulturguovddáža sajiid teáhterčájáhusaid hárjehallanbáikin ja čájáhusdoibmii.

Oktavuohtaolmmoš:  Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.